جۋىردا قازاقستان قولونەرشىلەر وداعىنىڭ ۇيىمداستىرۋىمەن الماتى قالاسىندا رەسپۋبليكالىق «شەبەر 2021» بايقاۋى ءوتتى. وعان ماڭعىستاۋ وبلىسىنداعى قۇرىق اۋىلىنىڭ تۇرعىنى اقشاگۇل قارىمساقوۆا قاتىسىپ، «ۇلتتىق مادەني برەند» نوميناسياسىنىڭ جەڭىمپازى اتاندى. بۇل تۋرالى قاراقيا اۋداندىق كاسىپكەرلىك جانە ونەركاسىپ ءبولىمىنىڭ باسشىسى ءاليا ءابدىحالىقوۆا ءمالىم ەتتى. 

ونىڭ ايتۋىنشا، قولونەر جارىسىنا ەلىمىزدىڭ ءار تۇكىپىرىنەن 100-دەن استام قولونەر شەبەرى قاتىسقان. فينالعا 20 ادام شىقتى. ونىڭ وننان استامى ءتۇرلى نوميناسيا بويىنشا جۇلدەگەر اتانعان. 

-«قازاقستان رەسپۋبليكاسى ۇلتتىق مۋزەيى مەن «شيەۆرون» كومپانياسىنىڭ قولداۋىمەن وتكەن «شەبەر» بايقاۋى ەل كولەمىندە 11-رەت ۇيىمداستىرىلىپ وتىر. سايىسقا «اداي رۋحىنىڭ تەكەمەتى» دەپ اتالاتىن قولونەر بۇيىمىمدى ۇسىنۋ ارقىلى فينالعا شىقتىم. ناتيجەسىندە «ۇلتتىق مادەني برەند» نوميناسياسىن جەڭىپ الدىم. بايقاۋ جوعارى دارەجەدە ءوتىپ، شەبەرلىك ساباقتارى دا ۇيىمداستىرىلدى»، - دەدى اقشاگۇل قارىمساقوۆا.

قاراقيا اۋدانى اكىمدىگىنىڭ باسپا ءسوز قىزمەتى