شىمكەنت قالاسىنىڭ اكىمى مۇرات ايتەنوۆ كورەيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى كۋ حونگ-سوكپەن كەزدەستى.
مارتەبەلى مەيمان قازاقستان مەن كورەيا اراسىنداعى ديپلوماتيالىق قارىم-قاتىناس ەكونوميكالىق، گۋمانيتارلىق سالالارداعى ارىپتەستىك بايلانىستارمەن جەمىستى جالعاسىن تاپقاندىعىن مالىمدەدى.
ەلشى رەسپۋبليكاداعى ءۇشىنشى قالا مارتەبەسىن يەلەنگەن شىمكەنت قالاسىنا تۇڭعىش مارتە كەلگەندىگىن جەتكىزىپ، بۇل جۇمىس ساپارى اياسىندا قالامىزبەن جاقىنىراق تانىسۋدى ماقسات تۇتقانىن اتاپ ءوتتى.
قالا باسشىسى كورەيا مەملەكەتىنىڭ ديپلوماتيالىق قىزمەت جەتەكشىسىنىڭ شۋاقتى شىمقالامىزعا جاساعان جۇمىس ساپارىنا ساتتىلىك تىلەي وتىرىپ، قالامىزدىڭ ەلىمىزدەگى الار ورنىن، ونىڭ بۇگىنگى ەكونوميكالىق الەۋەتىن كەڭىنەن تانىستىردى.
«شىمكەنت – قازاقستاننىڭ وڭتۇستىگىندەگى ءىرى وندىرىستىك، ساۋدا، مادەني جانە عىلىم مەن ءبىلىم ورتالىعى. قالامىزدىڭ ءتۇرلى ەكونوميكالىق سەكتورلارىندا ينۆەستيسيا تارتۋ مۇمكىندىگى قاراستىرىلعان. ءۇش يندۋستريالدى ايماقتا ءوندىرىس ورىندارى شوعىرلانىپ، ارنايى ەكونوميكالىق ايماق، ساۋدا-لوگيستيكالىق ورتالىعى ءتۇزىلدى. بۇل اۋماقتار بيزنەس سالىمدار ءۇشىن ءتيىمدى الاڭ رەتىندە قالىپتاسىپ، ينۆەستيسيالىق جوبالاردى ۇتىمدى ىسكە اسىرۋعا جاعداي جاسايدى. ينۆەستورلارعا ءوندىرىس ورنىن سالۋعا مۇمكىندىك بەرىلىپ، ينفراقۇرىلىمدىق جەلىلەرمەن قامتاماسىز ەتىلەدى. كوممۋنالدىق تولەمدەرگە جەڭىلدىكتەر قاراستىرىلعان. ارنايى ەكونوميكالىق ايماق قاتىسۋشىلارى ءۇشىن كەدەندىك جانە سالىقتار بويىنشا جەڭىلدىكتەر بار»، - دەپ اتاپ ءوتتى مۇرات دۇيسەنبەك ۇلى.
كەزدەسۋ بارىسىندا قازاقستان مەن كورەيا اراسىنداعى تاۋار اينالىمى 6،5 ملرد. اقش دوللارىنا جەتكەنى ايتىلدى. قوس تاراپ ءتيمىدى ەكونوميكالىق بايلانىستاردى نىعايتۋعا مۇددەلى ەكەندىكتەرىن جەتكىزدى.
كەزدەسۋدى قورىتىندىلاعان شىمكەنت قالاسىنىڭ اكىمى مۇرات ايتەنوۆ قازاقستان مەن كورەيا اراسىنداعى ديپلوماتيلىق قاتىناستارعا كەلەسى جىلى 30 جىل تولاتىنىن اتاپ ءوتتى. وسى جىلدار ىشىندە تۇزىلگەن سەنىمدى ارىپتەستىكتى ىسكەرلىك بايلانىستارمەن نىعايتۋعا شىمكەنت قالاسىنىڭ اكىمدىگى ءارقاشان دايىن ەكەندىگىن مالىمدەدى.
پىكىر قالدىرۋ