شىمكەنت قالاسى اكىمىنىڭ تاپسىرماسىنا سايكەس، ەرعالي بىلىسبەكوۆ مۇمكىندىگى شەكتەۋلى ازاماتتاردىڭ الەۋمەتتىك قورعالۋى مەن باسپانامەن قامتۋ جونىندە ونلاين قابىلداۋ وتكىزدى.

جەكە ءوتىنىشىن جەتكىزگەن ازاماتتاردىڭ ءبىرى جاسى 90-عا تاياعان كەيۋانا. اجەي مۇمكىندىگى شەكتەۋلى ازاماتتارعا الەۋمەتتىك قولداۋ، قاريالاردىڭ شيپاجايلاردا ەم قابىلداۋى مەن باسقا دا وزەكتى ماسەلەلەر بويىنشا ۇسىنىسىن ءبىلدىردى.

ەرعالي داۋلەتبەك ۇلى ءوز تاراپىنان بارلىق ءوتىنىشىن مۇقيات تىڭداپ، ءتيىستى باسقارما باسشىلارىنا زاڭ اياسىندا شەشۋ جولدارىن تاپسىردى.

قابىلداۋدا مۇگەدەك بالا تاربيەلەۋشى وتباسى مەن مۇمكىندىگى شەكتەۋلى جاندار دا تۇرعىن ءۇي ماسەلەسىن جەتكىزدى. اۋىر دەرتكە ۇشىراعان ەكى بالانىڭ اناسى باسپاناعا قول جەتكىزە الماي جۇرگەنىن ايتادى. قالا باسشىسىنىڭ ورىنباسارى زاڭ تالاپتارىنا ساي وعان بارلىق قولداۋ كورسەتىلىپ، الداعى ۋاقىتتا جاعدايدى ءوزى باقىلاۋدا ۇستايتىنىن ايتتى.

-ۇكىمەت تاراپىنان مۇقتاج جاندارعا الەۋمەتتىك قولداۋ قاراستىرىلعان. شىن مۇقتاج بولا تۇرا الاقان جايۋعا ۇيالاتىن جانداردى بايقاپ وتىرمىن. ماسەلەلەردى جان-جاقتى قاراستىرىپ، ولارعا قانداي كومەك قاجەت بولسا دا بارىنشا قول ۇشىن سوزۋعا تىرىسامىز. تابىسى تومەن ازاماتتارعا ازىق-تۇلىك، اتاۋلى الەۋمەتتىك كومەك كورسەتىلەدى. بارلىعى دا زاڭ اياسىندا،-دەدى ەرعالي بىلىسبەكوۆ.

جالپى، تۇرعىن ءۇي جانە الەۋمەتتىك كومەك بويىنشا قالا باسشىسى ورىنباسارىنىڭ قابىلداۋىنا 20-عا جۋىق ازامات جازىلعان. قازىرگى تاڭدا، شىمكەنت قالاسى بويىنشا تۇرعىن ءۇي الۋ كەزەگىندە 16 مىڭعا جۋىق حالىقتىڭ الەۋمەتتىك جاعىنان ءالسىز توبى ساناتىنداعى جاندار تىركەلگەن. قالاداعى تۇرعىن ءۇي باسقارماسىنىڭ مالىمەتىنشە، جىل باسىنان بەرى 682 وتباسى ارەندالىق پاتەرمەن قامتىلعان.