ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا سانيتاريالىق-ەپيدەميولوگيالىق جاعداي، اۋىلدىق ەلدىمەكەندەردە سۋمەن جابدىقتاۋ قىزمەتتەرىن قولجەتىمدى ەتۋ جانە جوعارى ءبىلىم بەرۋ ساپاسىن ارتتىرۋ ماسەلەلەرى قارالدى.
ۇكىمەت باسشىسى حالىقتى ۆاكسينالاۋمەن جانە ريەۆاكسينالاۋمەن قاجەتتى كولەمدە قامتاماسىز ەتۋدىڭ ماڭىزدىلىعىن اتاپ ءوتتى.
ددسۇ ۇسىنىسى بويىنشا ەلىمىزدە ۆاكسينالاۋعا جاتاتىن ادامدار ساناتى كەڭەيۋدە. بۇگىندە جەتى وڭىردە جاسوسپىرىمدەردى، جۇكتى جانە بالا ەمىزەتىن انالاردى ۆاكسينالاۋ باستالدى. وڭىرلەرگە Comirnaty (Pfizer) ۆاكسيناسى جىبەرىلگەن. شىمكەنت قالاسىندا دا اتالعان ۆاكسينانى ەگۋ جۇمىستارى جۇرگىزىلۋدە.
قازىرگى ۋاقىتتا رەسپۋبليكا بويىنشا 12-18 جاستاعى 1313 بالا، 247 جۇكتى جانە بالا ەمىزەتىن انا ۆاكسينالاندى.
ۇكىمەت باسشىسى سانيتارلىق تالاپتاردى قامتاماسىز ەتۋ جانە مونيتورينگتىك توپتاردىڭ ولاردى ساقتاۋىن باقىلاۋ بويىنشا شارالار قابىلداۋدى ودان ءارى جالعاستىرۋدى تاپسىردى.
سونىمەن قاتار، جيىندا اۋىلدىق ەلدىمەكەندەردە سۋمەن جابدىقتاۋ قىزمەتتەرىن قولجەتىمدى ەتۋ جۇمىستارىنىڭ بارىسى تالقىعا ءتۇستى. 2025 جىلدىڭ سوڭىنا دەيىن حالىقتى تازا اۋىزسۋمەن قامتۋدى 100 پايىزعا جەتكىزۋ مىندەتى تۇر. 2021 جىلدىڭ قورىتىندىسى بويىنشا قالالاردا اۋىزسۋمەن قامتۋ 98 پايىزعا جەتپەك.
نۇر-سۇلتان جانە شىمكەنت قالالارىندا وندىرىستىك پروسەستەردى اۆتوماتتاندىرۋ جانە ەسەپتەۋ قۇرىلعىلارىن ورناتۋ ەسەبىنەن تۇرعىنداردىڭ قاراجاتى ۇنەمدەلىپ، سۋ جانە قىزمەت كورسەتۋ شىعىندارى ازايعان. ق ر پرەمەر-مينيسترى وسىنداي تاسىلدەردى ەلدىڭ باسقا وڭىرلەرىنە دە قولدانۋ قاجەتتىگىنە نازار اۋداردى.
سالانى اۆتوماتتاندىرۋ جانە يننوۆاسيالىق تەحنولوگيالاردى قولدانۋ بويىنشا جۇمىس قارقىنىن ارتتىرۋ قاجەت.
ايتا كەتسەك، شىمكەنت قالاسىندا 2023 جىلى ساپالى اۋىزسۋمەن قامتۋ ماسەلەسى تولىقتاي شەشىلەدى.
پىكىر قالدىرۋ