ءبىلىم جانە عىلىم ءمينيسترى اسحات ايماعامبەتوۆ مەملەكەتتىك ءبىلىم بەرۋ ۇيىمدارىنىڭ ءبىرىنشى باسشىلارىن روتاسيالاۋ قاعيدالارى ادىلەت مينيسترلىگىندە تىركەلگەنىن مالىمدەدى.
ايتۋىنشا، ءبىلىم بەرۋ جۇيەسىندە مەكتەپ، كوللەدج جانە بالاباقشا ديرەكتورلارىن روتاسيالاۋ ينستيتۋتى پايدا بولدى.
– ءبىلىم بەرۋ سالاسىندا 10 مىڭنان استام مەملەكەتتىك ۇيىم بار. كوپتەگەن باسشىلار، مەرزىمسىز ەڭبەك كەلىسىمشارتتارىن جاساسقان. وسىعان بايلانىستى ءبىر ۇيىمدا 10-15 جىل جانە ودان دا كوپ جۇمىس ىستەيتىندەر از ەمەس. ارينە، ولاردىڭ اراسىندا ءوز جۇمىسىن جاقسى بىلەتىن جانە مەكتەپ، كوللەدج، مەكتەپكە دەيىنگى نەمەسە قوسىمشا ءبىلىم بەرۋ ۇيىمدارىنىڭ دامۋىنا ەلەۋلى ۇلەس قوساتىن باسشىلار بار. دەگەنمەن، 10-15 جىل بويى ءبىر ورىندا وتىرىپ، وزدەرىنىڭ باستاماشىلدىعى مەن دامۋعا دەگەن ىنتاسىن جوعالتاتىن مەكتەپ ديرەكتورلارى دا بار، – دەدى ول.
مينيستر ادام ۇزاق جىلدار بويى ءبىر ءبىلىم بەرۋ ۇيىمىن باسقارسا، بۇل موتيۆاسيانىڭ تومەندەۋىنە، جۇمىس بارىسىندا جاڭا تاسىلدەردىڭ بولماۋىنا اكەلۋى مۇمكىن ەكەنىن ەسكەرتتى.
– باسشىلىق ەتەتىن ۇيىمنىڭ اۋىسۋى وزگەرىستەردى ەنگىزۋگە جانە باسشىنىڭ جۇمىستاعى تيىمدىلىگىن ارتتىرۋعا مۇمكىندىك بەرەدى، – دەدى ايماعامبەتوۆ.
ءبىلىم ءمينيسترى ەرەجەلەردىڭ نەگىزگى باسىمدىقتارىنا توقتالىپ ءوتتى:
- بىرىنشىدەن، ءبىر ءبىلىم بەرۋ ۇيىمىندا 4 نەمەسە 7 جىلدان استام جۇمىس ىستەگەن باسشىلار روتاسيالانادى.
بۇل رەتتە، وسى ءبىلىم بەرۋ ۇيىمىندا لاۋازىمعا تاعايىندالعان كۇننەن باستاپ 4 جىل جۇمىس اتقارعان ءبىرىنشى باسشى روتاسيادان ءوتىنىشى نەگىزىندە بوساتىلىپ، تيىسىنشە قولدانىستاعى ەڭبەك شارتى شەڭبەرىندە ءوز جۇمىسىن جالعاستىرا الادى.
الايدا، ەگەر باسشى اتالعان ۇيىمدا 7 جىلدان استام ۋاقىت جۇمىس ىستەسە، وندا ول مىندەتتى تۇردە روتاسيالانادى. وسىلايشا، ءبىر ءبىلىم بەرۋ ۇيىمىنا جەتەكشىلىك ەتۋ مەرزىمى 7 جىلدان اسپاۋى ءتيىس.
- ەكىنشىدەن، روتاسيالاۋدىڭ تومەندەگىدەي شارتتارى بار:
– روتاسيالاۋدى وبلىستاردىڭ جانە رەسپۋبليكالىق ماڭىزى بار قالالاردىڭ ءبىلىم باسقارمالارى جۇزەگە اسىرادى؛
– روتاسيا ءبىر ەلدى-مەكەن اۋماعىندا جۇرگىزىلەدى؛
– روتاسيالاۋدى ءبىر دەڭگەيدەگى ۇيىم باسشىلارى اراسىندا جۇرگىزەدى؛
– روتاسيالاۋ كەزىندە ءبىرىنشى باسشىلاردىڭ بىلىكتىلىك ساناتى، ياعني اتالعان سانات ءۇشىن تولەنەتىن قوسىمشا اقى دا مەرزىمى اياقتالعانعا دەيىن ساقتالادى.
پىكىر قالدىرۋ