شىمكەنتتە ەمحانالار مەن ءبىلىم بەرۋ ۇيىمدارىنىڭ ەگۋ پۋنكتتەرىندە جاسوسپىرىمدەردى كوروناۆيرۋسقا قارسى ۆاكسينالاۋ قارقىندى ءجۇرىپ جاتىر. بۇل جولى كۆي-گە قارسى ەكپە ەگۋ جۇمىستارى م.ح.دۋلاتي اتىنداعى ءۇش تىلدە وقىتاتىن مامانداندىرىلعان №8 گيمنازياسىندا جالعاستى. قالالىق №14 ەمدەۋ ورتالىعىنىڭ دارىگەرلەرى مەكتەپتە جاسوسپىرىمدەرگە ەكپە سالدى.

مەكتەپ ديرەكتورى اينۇر ساحوۆانىڭ ايتۋىنشا، اتالعان ءبىلىم ۇياسىندا 12 مەن 17 جاس ارالىعىندا 883 وقۋشى وقيدى. ونىڭ ىشىندە كوميرناتي (Pfizer ءوندىرۋشى) ۆاكسيناسىن سالدىرۋعا 100-گە جۋىق اتا-انا نيەت بىلدىرگەن. قالا تۇرعىنى گۇلجان نۇرلىحان قىزى مەكتەپتەگى ەكپە ەگۋ پۋنكتىنە ەكى بالاسىنا ۆاكسينا سالدىرۋعا كەلگەن. ۇلى دارىن ابدرامان 10-سىنىپتا وقىسا، قىزى سابيرا ابدرامان 9-سىنىپتىڭ وقۋشىسى.

– كوكتەمدە جاپپاي ۆاكسينالاۋ باستالعاندا، جۇبايىممەن العاشقىلاردىڭ ءبىرى بولىپ ەكپە قابىلدادىق. بۇگىن بالالارىما ۆاكسينا سالدىرۋعا ارنايى ءوزىم كەلدىم. كۇندەلىكتى بۇقارالىق اقپارات قۇرالدارى ارقىلى ۆاكسينانىڭ پايدالى ەكەنىن ايتىپ جاتىر. مەكتەپتەگى مەدبيكە دە بىزگە ەكپە الۋدىڭ ءتيىمدى ەكەنىن ءتۇسىندىردى. سوندىقتان ۇلىم مەن قىزىما ۆاكسينا سالامىز دەپ شەشتىك. بۇعان دەيىن سوزىلمالى نەمەسە جۇقپالى اۋرۋلارمەن اۋىرماعان. تۋعاننان باستاپ بارلىق ەكپەنى ۋاقىتىندا سالدىرىپ كەلدىك. سونىڭ ارقاسىندا بالالارىم اۋىرمادى دەپ ويلايمىن. اركىم سانالى تۇردە شەشىم قابىلدايدى. ءبىز ءۇشىن ۇل-قىزىمنىڭ ساۋلىعى ماڭىزدى، ءقازىر ولاردىڭ جاعدايى جاقسى، - دەيدى گۇلجان تاشمانوۆا.

ال №14 ەمدەۋ ورتالىعىنىڭ ءسوس دارىگەرى ءاليا بەكبول قىزى تۇسكە دەيىن مەكتەپتە 30-دان استام وقۋشىعا ەكپەنىڭ ءبىرىنشى كومپونەنتى سالىنعانىن مالىمدەدى. بارلىق ءجاسوسپىرىمنىڭ جاعدايى باقىلاۋعا الىنعان. العاشقى 30 مينۋتتا كۇتۋ زالىندا دارىگەرلەردىڭ باقىلاۋىندا بولسا، 3 كۇن مەكتەپتىڭ مەدبيكەسى ەكپە العان وقۋشىلاردىڭ دەنساۋلىعىن قاداعالاپ وتىراتىنىن جەتكىزدى.

ازامات جادىگەر ۇلى