قۇرىلىستا ىستەپ ءجۇرىپ ءان ايتىپ جەلىدە تانىمال بولعان گۇلمايدان سەرىكباي (لاقاپ اتى – دانا) قامشى تىلشىسىنە سۇحبات بەردى. گۇلمايدان جەلىدە كەڭىنەن تاراعان ۆيدەو قاشان جانە قانداي جاعدايدا تۇسىرىلگەنىن، ءوزى تۋرالى جانە كەلىپ ءتۇسىپ جاتقان ۇسىنىستار تۋرالى ايتتى.
گۇلمايدان سەرىكباي عالىمجان قىزى 1994 جىلى قىزىلوردا وبلىسى شيەلى اۋدانى بەستام اۋىلىندا دۇنيەگە كەلگەن. قىزىلوردا قالاسىنداعى قورقىت اتا ۋنيۆەرسيتەتىندە "جوعارى مۋزىكالىق ءبىلىم" ماماندىعىندا وقىپ، الايدا وتباسىلىق جاعدايعا بايلانىستى وقۋىن 3-كۋرستان كەيىن تاستاپ كەتۋگە ءماجبۇر بولعان.
گۇلمايدان انشىلىك ونەرگە بۇرىننان جاقىن بولعانىن ايتادى.
– جالپى ماعان انشىلىك ونەر ناعاشى اجەم ىرىسقال وكسىكبايەۆادان دارىعان شىعار دەپ ويلايمىن. ءبىراق ول كىسىنى ءوزىم مۇلدەم كورمەگەنمىن. ۇلكەندەر "داۋىسى جاقسى بولعان ەدى" دەپ ايتىپ وتىراتىن. نەگىزى انشىلىككە بۇرىننان جاقىن بولدىم. كافە، مەيرامحانالاردا ءان ايتىپ، كاسىبي تۇردە اينالىسقانىم بار. كەيىن پاندەميا باستالىپ، ءبارى كارانتينگە جابىلعاندا جۇمىس توقتاپ، تابىسسىز قالدىم. جانباعۋ ءۇشىن قۇرىلىسپەن اينالىسۋعا تۋرا كەلدى، – دەيدى جەلى جۇلدىزى.
گۇلمايدان سەرىكباي ءبىر ساتتە جەلىدە تانىمال بولىپ كەتكەنىنە ءالى دە سەنە الار ەمەس.
– ءوزىمدى ءالى "جۇلدىز" بولدىم دەپ ەسەپتەمەيمىن. ءبىراق حالىققا تانىمال بولۋ وتە كەرەمەت سەزىم ەكەن. بۇنداي جاعدايعا كەز كەلگەن ادام قۋاناتىن ەدى دەپ ويلايمىن. كەيدە وسىنىڭ ءبارى ءتۇس سياقتى كورىنەدى، – دەيدى ول.
ايتۋىنشا، جەلىدە تاراعان ۆيدەونى ارنايىلاپ تۇسىرمەگەن.
– الماتىعا كەلگەنىمە 4 اي بولدى. قىزدارمەن بىرگە جۇمىس ىستەيمىز. جەلىدە تاراعان ۆيدەو مەكتەپتى رەمونتتاپ جاتقان كەزىمىزدە الدىڭعى اپتادا تۇسىرىلگەن. بىرگە جۇمىس ىستەيتىن اپكەمدەي بولىپ كەتكەن جۇلدىز دەگەن قىز بار. سول ءان ايتىپ جاتقانىمدى سىرتىمنان ءتۇسىرىپ، جەلىگە سالىپ جىبەرىپتى. ۆيدەو ءتۇرلى پابليكتەرگە تەز تارالىپ، ءبارى اپ-ساتتە بولىپ كەتتى. مەن مۇندايدى مۇلدەم كۇتپەدىم. ونىڭ الدىندا جۇلدىز ماعان "اندەرىڭدى الەۋمەتتىك جەلىگە سالايىق" دەپ ۇنەمى ايتاتىن. مەن وعان كەلىسپەي ءجۇردىم. سويتسەم، سىرتىمنان ءتۇسىرىپ، سالىپ جىبەرىپتى، – دەيدى ءانشى قىز.
قازىرگى تاڭدا گۇلمايدانعا ءتۇرلى ۇسىنىس كەلىپ جاتقان كورىنەدى.
– ءقازىر پروديۋسەر بولۋعا نيەت ءبىلدىرىپ، ۇسىنىس ايتىپ جاتقاندار بار. ءتىپتى ولەڭ مەن ءسوز جازىپ بەرگىسى كەلەتىندەر تابىلۋدا. بەت ارلەۋشىلەرگە دەيىن حابارلاسىپ، كومەك بەرگىسى كەلەتىندەرىن جەتكىزىپ جاتىر. تەلەارنالار دا ءجيى شاقىرادى، – دەگەن ول نەگىزىنەن باتىس ەلدەرى ارتىستەرىنىڭ ونەرىن جاقسى كورەتىنىن، وتاندىق ارتىستەردىڭ ىشىنەن ديماش قۇدايبەرگەندى، جانار دۇعالوۆا، ايقىن تولەپبەرگەن، Ninety One توبىن تىڭدايتىنىن، ديماشپەن دۋەت جازعىسى كەلەتىنىن ايتادى.
قازىرگى ۋاقىتتا گۇلمايداننىڭ Instagram پاراقشاسىنا 60 مىڭعا جۋىق ادام جازىلىپ ۇلگەرگەن. ونىڭ ۆيدەولارى العاش Tik-tok جەلىسىندە تاراپ، تانىمال بولا باستاعاننان كەيىن عانا Instagram-نان پاراقشا اشقان.
پوسموترەت ەتۋ پۋبليكاسيۋ ۆ Instagram
پوسموترەت ەتۋ پۋبليكاسيۋ ۆ Instagram
پىكىر قالدىرۋ