اق ءۇي باسپا ءسوز حاتشىسى دجەن پساكي 7 جەلتوقسان كۇنى اقش پرەزيدەنتى دجو بايدەن مەن رەسەي پرەزيدەنتى ۆلاديمير پۋتين اڭگىمەلەسەتىنىن ءمالىم ەتتى.
"پرەزيدەنت كىشى دجوزەف ر. بايدەن 2021 جىلعى 7 جەلتوقساندا قورعالعان ۆيدەوقوڭىراۋ ارقىلى رەسەي پرەزيدەنتى ۆلاديمير پۋتينمەن سويلەسەدى. مەملەكەت باسشىلارى اقش پەن رەسەيگە قاتىستى بىرنەشە ماسەلەنى تالقىلايدى. ولاردىڭ قاتارىندا ستراتەگيالىق تۇراقتىلىق، كيبەرقاۋىپسىزدىك، ايماقتىق ماسەلەلەر بار. پرەزيدەنت بايدەن اقش ۋكراينا شەكاراسى ماڭىنداعى رەسەيدىڭ اسكەري قيمىلدارىنا الاڭداۋشىلىق ءبىلدىرىپ، ۋكراينانىڭ اۋماقتىق تۇتاستىعى مەن ەگەمەندىگىن قولدايتىنىن جەتكىزدى" دەلىنگەن اقپاراتتىق حابارلامادا.
سوڭعى ۋاقىتتا رەسەيدىڭ ۋكراينا ماڭىنا اسكەرىن ۇيىپ-توگىپ، دوق كورسەتۋى جيىلەپ كەتتى. ماسكەۋ سوڭعى اپتالاردا ۋكراينا شەكاراسىنا ونداعان مىڭ جاۋىنگەر شوعىرلاندىرىپ، ۇلكەن جاتتىعۋعا كىرىستى. بۇعان ناتو الاڭداۋشىلىق ءبىلدىرىپ، ءوز كەزەگىندە اسكەرى مەن قارۋ-جاراعىن ۋكرايناعا ورنالاستىرىپ قويدى.
ازىرگە ەكى تاراپتىڭ ارەكەتتەرى بىر-بىرىنە ايبات كورسەتۋمەن شەكتەلىپ وتىر.
اقش مەملەكەتتىك حاتشىسى انتونيي بلينكەن رەسەيدىڭ ۋكرايناعا قارسى اگرەسسيۆتى قادامدار جوسپارلاپ وتىرعانى قاتتى الاڭداتاتىنىن ايتىپ، رەسەيگە اسكەري كۇشتەرىن ۋكراينا شەكاراسىنان الىپ كەتۋدى تالاپ ەتەتىندەرىن جەتكىزدى. سونداي-اق ول ەگەر رەسەي ۋكرايناعا باسىپ كىرەتىن بولسا، ۇلكەن قۇن تولەيتىنىن ءمالىم ەتتى.
ال رەسەي ناتو-نىڭ شىعىسقا قاراي كەڭەيۋى ماسكەۋدىڭ نەگىزگى قاۋىپسىزدىك مۇددەلەرىنە قاتەر توندىرگەنىن ايتىپ، مۇنى "قىزىل سىزىق" دەپ باعالايتىنىن، جاعداي جالعاسا بەرسە، وعان قاتاڭ جاۋاپ بەرىلەتىنىن مالىمدەدى.
پىكىر قالدىرۋ