ۇلىبريتانيادا ورنالاسقان بەيرەسمي تريبۋنال قىتايدىڭ شىڭجاڭداعى ۇيعىر، قازاق سياقتى ازشىلىقتارعا گەنوسيد جاساپ جاتقانىن مالىمدەدى.
تريبۋنال بەيسەنبى كۇنگى قورىتىندىعا كەلۋىنىڭ باستى سەبەبى رەتىندە بەيجىڭنىڭ شىڭجاڭداعى مۇسىلمان ازشىلىقتاردىڭ تۋۋىن باقىلاۋى جانە ستەريليزاسيا سياقتى شارالارىن اتادى.
تريبۋنال تىڭداۋلارىنا ءتوراعالىق ەتكەن تانىمال بريتاندىق ادۆوكات سەر دجەففري ءنيستىڭ ايتۋىنشا، ونىڭ القاسى قىتايدىڭ "ەتنيكالىق ازشىلىقتاردىڭ سانىن ۇزاق مەرزىمدى قىسقارتۋ" ءۇشىن "ادەيى، جۇيەلى جانە كەلىسىلگەن ساياسات" جۇرگىزگەنىن انىقتاعان. ول شىڭجاڭ ايماعىنداعى مۇسىلمان ازشىلىقتارىنا جاسالعان قيانات ءۇشىن جوعارى لاۋازىمدى تۇلعالار، سونىڭ ىشىندە جۇڭگو ءتوراعاسى سي ءسزينپيندى دە "نەگىزگى جاۋاپكەرشىلىكتە" دەپ سانايتىنىن ايتتى.
تريبۋنال القاسى زاڭگەرلەر مەن عالىمداردان قۇرالعان. ونىڭ قورىتىندىسىنىڭ زاڭدى كۇشى جوق جانە ۇلىبريتانيا مينيسترلەرى ءۇشىن مىندەتتى ەمەس، ءبىراق ونى ۇيىمداستىرۋشىلار قىتايعا قارسى ايىپتاۋلارعا قاتىستى دالەلدەمەلەردى قوسىپ، گەنوسيد ماسەلەسى بويىنشا تاۋەلسىز قورىتىندى جاساۋعا نيەتتى ەكەنىن ايتتى.
جۇڭگو ۇكىمەتى شىڭجاڭداعى ادام قۇقىقتارى بۇزىلدى دەگەن بارلىق ايىپتاۋلاردى جوققا شىعارادى. بەيسەنبى كۇنى تريبۋنالدىڭ شەشىمىنە جاۋاپ بەرگەن قىتايدىڭ باسپا ءسوز حاتشىسى BBC-گە بۇل ورگان "جالعان تريبۋنال" دەپ مالىمدەدى. سونىمەن قاتار ول "قىتايعا قارسى ەلەمەنتتەر حالىقتى الداۋ جانە اداستىرۋ ءۇشىن قولداناتىن ساياسي قۇرال" ەكەنىن ايتتى.
پىكىر قالدىرۋ