جەلىدە جەلدەي ەسكەن ءموبيلدى اۋدارىمدارعا قاتىستى اقپار بۇقارا اراسىندا داۋ تۋعىزۋدا. ءتىپتى قولما-قول اقشامەن ەسەپ ايىرىسۋعا كوشكەندەردە جوق ەمەس. ەلدى داۋرىقتىرعان جاڭالىققا «Jetisy Media» الاڭىندا الماتى وبلىسى بويىنشا مەملەكەتتىك كىرىستەر دەپارتامەنتىنىڭ وكىلدەرى تۇسىنىك بەردى.
اڭگىمەنىڭ ءالقيساسى، سالىق زاڭناماسىنا ءموبيلدى اۋدارىمداردى پايدالانۋعا قاتىستى ەنگىزىلگەن وزگەرتۋلەر، جەكە تۇلعالاردىڭ جەكە اۋدارىمدارىن كاسىپكەرلىك ماقساتتا جۇزەگە اسىرىلاتىن ءموبيلدى تولەمدەردەن بولۋگە ارنالعاندىعىن ايشىقتاۋدان باستالدى. ياعني، جاڭا ەرەجە سيفرلىق كەڭىستىكتە بيزنەستى دامىتۋدى كوزدەيدى.
«ولار بيزنەس قاۋىمداستىقپەن جانە بانكتەرمەن بىرنەشە رەت تالقىلاندى.بۇل باستامالاردىڭ ماقساتى، قولما-قول اقشاعا كوشۋدى مۇلدەم كوزدەمەيتىنىن ەسكەرىڭىز. مۇنىمەن قوسا، بارلىق مالىمەتتەر مەملەكەتتىك كىرىس ورگاندارىنا بەرىلەدى ەكەن دەگەن اقپارات تا نەگىزسىز. الاڭداۋعا ەشقانداي نەگىز جوق. 2022 جىلدان باستاپ بانكتەردەن تەك كاسىپكەرلىك شوتتارىنا تۇسكەن تولەمدەر تۋرالى اقپارات الۋ جوسپارلانۋدا. سوندىقتان، جەكە اۋدارىمدارعا سالىق سالىنبايدى»،-دەپ اتاپ ءوتتى الماتى وبلىسى بويىنشا مەملەكەتتىك كىرىستەر دەپارتامەنتى باسشىسىنىڭ ورىنباسارى المات كالييەۆ.
ماماندار، جەكە كاسىپكەر بولساڭىز، سالىق سالۋ بويىنشا وزىڭىزگە ىڭعايلى رەجيمدى تاڭداۋعا بولاتىندىعىن تىلگە تيەك ەتتى.
«مەن ءبىر مىسال كەلتىرە كەتەيىن، تاكسي جۇرگىزۋشىلەرى پاتەنت نەگىزىندە ارنايى سالىق رەجيمىن قولدانا الادى. بۇل رەجيم تابىسى جىلىنا 10 ميلليون 300 مىڭ تەڭگەدەن اسپايتىن جاعدايدا عانا قولدانىلادى»،-دەدى كامەرالدىق باقىلاۋ مونيتورينگى باسقارماسىنىڭ باس مامانى اۋەلحان اليشەروۆ.
كاسىپ يەلەرىنىڭ كاسسالىق اپپاراتتى قولدانۋىنا كەلەر بولساق، كاسىپكەر ونلاين كاسسانىڭ ءموبيلدى نۇسقاسىن جۇكتەپ الىپ، زاڭدى تۇردە پايدالانا الادى. ال سالىق ەسەپتىلىگى e-Salyq Business قوسىمشاسىن ەنگىزۋ ارقىلى اۆتوماتتى تۇردە جاسالادى. بۇل شارالاردىڭ بارلىعى بيزنەستى جۇرگىزۋدى ودان ءارى جەڭىلدەتۋگە باعىتتالعاندىعىن اتاپ وتكەن ابزال.
ەسكە سالايىق، قابىلدانعان موراتوريي اياسىندا جەكە كاسىپكەرلەر 2023 جىلعا دەيىن تابىس سالىعىن تولەۋدەن بوساتىلعان.
پىكىر قالدىرۋ