اتىراۋ وبلىسىنىڭ اكىمى ماحامبەت دوسمۇحامبەتوۆ ءوزىنىڭ ورىنباسارى باقىتگۇل حامەنوۆانىڭ ىسىنە قاتىستى پىكىرىن ءبىلدىردى. بۇل تۋرالى اكىم بۇگىنگى ۇكىمەت وتىرىسىنان كەيىن جۋرناليستەر سۇراعىنا جاۋاپ بەرگەن.
– حامەنوۆانىڭ ورنىندا ازىرگە ەشكىم جوق. ونىڭ قىزمەتى اكىمنىڭ ورىنباسارلارى اراسىندا بولىنگەن. تەرگەۋ ءجۇرىپ جاتىر، تەرگەۋدەن كەيىن ءبارى بەلگىلى بولادى. مەن بۇل ىسكە تۇسىنىكتەمە بەرە المايمىن. ءقازىر تەرگەۋ ءجۇرىپ جاتىر. 10 جەلتوقساندا كءىنالى مە، جوق پا، سول كەزدە انىقتالادى، – دەدى وبلىس اكىمى.
حامەنوۆانىڭ ۇستالۋىن قالاي قابىلدادىڭىز دەگەن سۇراققا اكىم: "ارينە، قاتتى قاپالاندىم" دەپ جاۋاپ بەردى.
اكىم ورىنباسارلارىنىڭ كىناسى دالەلدەنسە وتستاۆكاعا كەتۋگە دايىن ەكەنىن ايتتى.
– مەندە ونداي اقپارات جوق، ەستىگەن جوقپىن. بۇل ماسەلەنى رەتتەيتىن زاڭ بار. ەگەر ورىنباسارلارىمنىڭ سىبايلاس جەمقورلىق جاساعانى انىقتالسا، وندا زاڭعا سايكەس مەن وتستاۆكاعا كەتۋىم كەرەك. ال ونى مەملەكەت باسشىسى قابىلدايدى، – دەدى دوسمۇحامبەتوۆ.
ءبىراق ماحامبەت دوسمۇحامبەتوۆ تەرگەۋ قورىتىندىسىن كۇتۋگە كەڭەس بەرەدى.
وبلىس اكىمى اتىراۋدا اباي ەسكەرتكىشىن ورناتۋ جۇمىستارى كەيىنگە شەگەرىلۋى مۇمكىن ەكەنىن اتاپ ايتتى.
– ەسكەرتكىش تۋرالى شەشىم، قاتەلەسپەسەم، 2016 جىلى قابىلدانعان. پاندەميا كەزىندە جۇمىستى جۇرگىزە المادىق، ەسكەرتكىشتى بيىل ورناتۋ جوسپاردا بار ەدى. ءيا، ۋاقىتى سوزىلۋى مۇمكىن نەمەسە سوزىلمايدى. تەرگەۋ اسەر ەتە مە، ايتا المايمىن، – دەپ جاۋاپ بەردى ماحامبەت دوسمۇحامبەتوۆ.
ەسكە سالا كەتەيىك، 10 جەلتوقسان كۇنى اتىراۋ وبلىسى اكىمىنىڭ ورىنباسارى باقىتگۇل حامەنوۆا مەن وبلىستىق مادەنيەت باسقارماسىنىڭ باسشىسى اقىلبەك رىسقالييەۆ 4،5 ملن تەڭگە كولەمىندە پارا الدى دەگەن كۇدىكپەن ۇستالعان بولاتىن.
كەيىن اتىراۋ قالاسىنىڭ مامانداندىرىلعان تەرگەۋ سوتى يزولياتوردا وتىرعان وبلىس اكىمىنىڭ ورىنباسارى باقىتگۇل حامەنوۆانى ءۇيقاماققا جىبەرىلگەنىن مالىمدەگەن.
سوت كۇدىكتىنىڭ ەكى بالانى تاربيەلەپ وتىرعان جالعىزباستى انا ەكەنىن، اسىراۋىندا قارت اناسى بارىن، اتىراۋدا تۇرعىلىقتى مەكەنجايى بارىن، قىلمىستىق قۋدالاۋ ورگاندارىنان جاسىرىنباعانىن جانە بۇرىن سوتتالماعانىن ەسكەرگەن.
پىكىر قالدىرۋ