IDF Eurasia كرەديت ۇيىمى نەسيە الۋدا قازاقستاندىقتاردىڭ قانداي توبى قيىندىققا تاپ بولاتىنى تۋرالى زەرتتەۋ قورىتىندىسىن جاريالادى. زەرتتەۋ كورسەتكەندەي، ايلىق ەڭبەكاقىسى 300 مىڭ تەڭگەدەن باستالاتىن ءوزىن-وزى جۇمىسپەن قامتىعاندار ساناتىنداعى ازاماتتاردىڭ 50 پايىزىنا كرەديتكە ءوتىنىش بەرگەندە تەرىس جاۋاپ كەلگەن.

زەرتتەۋگە 12 مىڭ ادام قاتىسقان. ونىڭ 60 پايىزى ءوزىن-وزى جۇمىسپەن قامتىعاندار.

ۇيىم كەلتىرگەن دەرەككە ساي، 2021 جىلى ءوزىن-وزى جۇمىسپەن قامتۋشىلاردىڭ 52 پايىزى بانكتەرگە كرەديت الۋعا ءوتىنىش بىلدىرگەن. ولاردىڭ جارتىسىنا بانك باس تارتقان. سۇرالعاندار بانك مۇنداي ساناتتاعى ازاماتتاردى "سەنىمسىز قارىز الۋشى" دەپ سانايتىنىن جەتكىزگەن.

دەسە دە بۇل ساناتتاعى ازاماتتاردىڭ ەڭبەكاقىسى ورتاشادان جوعارى بولىپ كەلەدى. ماسەلەن، زەرتتەۋگە قاتىسقان ءوزىن-وزى جۇمىسپەن قامتۋشىلاردىڭ 53 پايىزى 300 مىڭ تەڭگە كولەمىندە جالاقى الاتىنىن ايتسا، 17 پايىزى 500 مىڭ، 20 پايىزى 600 مىڭ تەڭگەدەن جوعارى تاباتىنىن جەتكىزگەن. 

قازاقستاندىقتاردىڭ 75 پايىزى بانك نەسيە ءوتىنىشىن قاراستىرعاندا ءوزىن-وزى جۇمىسپەن قامتۋشىلارعا رەسمي جۇمىس ىستەمەيتىندىكتەن باس تارتادى دەگەن پىكىردە. 15 پايىزى ءوزىن-وزى جۇمىسپەن قامتۋ ستاتۋسىندا كرەديت تاريحىنىڭ بولماۋىمەن بايلانىستىرسا، 10 پايىزى مۇنداي ساناتقا باعىتتالعان ارنايى كرەديت ءونىمى قاراستىرىلماعانىمەن تۇسىندىرەدى.

بيزنەس ماقساتتاعى كرەديتتەر ءوزىن-وزى جۇمىسپەن قامتۋشىلاردىڭ تەك 10 پايىزىنا بەرىلگەن. 40 پايىزى تۇتىنۋشىلىق نەسيە السا، 12 پايىزىنا عانا يپوتەكا رەسىمدەلگەن. 25 پايىزى مۇلكىن كەپىلگە قويىپ بارىپ كرەديت الا العان.