اقش سەناتى قىتايدىڭ شىڭجاڭ ايماعىنان كەلەتىن يمپورتقا تىيىم سالۋ تۋرالى زاڭ جوباسىن قابىلدادى. "بۇل بەيجىڭنىڭ شىڭجاڭداعى ۇيعىر، قازاق سياقتى مۇسىلمان ازشىلىعىنا جاساعان قاتال ساياساتىنا قارسى ۆاشينگتون ارەكەتىنىڭ ءبىر بولىگى" دەپ حابارلادى CNN .
اقش سەناتى شىڭجاڭداعى ازشىلىقتاردىڭ ءماجبۇرلى ەڭبەككە جەگىلۋىنە جول بەرمەۋ تۋرالى زاڭدى ءبىراۋىزدان ماقۇلداپ، زاڭ جوباسىن اق ۇيگە جىبەردى. اقش پرەزيدەنتى دجو بايدەن وعان قول قوياتىنىن ايتتى.
وكىلدەر پالاتاسى زاڭ جوباسىن ءبىراۋىزدان داۋىس بەرۋ ارقىلى قابىلدادى.
اقش زاڭ شىعارۋشىلارى پالاتادا جانە سەناتتا ىمىراعا كەلگەننەن كەيىن زاڭ جوباسى كونگرەسسكە وتكەن.
رەسپۋبليكاشىل سەناتور ماركو رۋبيو سەناتورلاردى زاڭ جوباسىنا داۋىس بەرۋگە شاقىرىپ، شىڭجاڭداعى قازاق، ۇيعىر سياقتى ەتنيكالىق ازشىلىقتارعا جاسالعان ساياساتتى "ادام قۇقىقتارىنىڭ قورقىنىشتى جاعدايى" دەپ سيپاتتادى.
جۇڭگو كۇن پانەلدەرى ءۇشىن ماتەريالداردىڭ كوپ بولىگىن قامتاماسىز ەتەتىن شىڭجاڭداعى زاڭ بۇزۋشىلىقتاردى جوققا شىعارادى، ءبىراق اقش ۇكىمەتى مەن كوپتەگەن قۇقىق قورعاۋ ۇيىمدارى "بەيجىڭ شىڭجاڭدا گەنوسيد جاساپ جاتىر" دەپ سانايدى.
رەسپۋبليكاشىلدار بايدەننىڭ دەموكراتتارىن زاڭ جوباسىن باياۋ جۇرگىزدى دەپ ايىپتايدى.
اقش ۇكىمەتى "شىڭجاڭداعى مۇسىلمان ازشىلىقتاردى باسىپ-جانشۋعا قاتىسى بار جانە اسكەري كۇشتەرگە كومەكتەستى" دەپ ايىپتاپ، قىتايدىڭ ونداعان كومپانياسىنا ينۆەستيسيا مەن ەكسپورتقا شەكتەۋ قويعان.
پىكىر قالدىرۋ