اتىراۋ وبلىسىنىڭ اكىمدىگى باقىتگۇل حامەنوۆانىڭ قىلمىستىق ىسىندە كورىنىس تاپقان اباي قۇنانبايەۆ ەسكەرتكىشىنە قاتىستى سۇراققا جاۋاپ بەردى. بۇل تۋرالى azh.kz باسىلىمى حابارلادى.

باسىلىم تاراتقان اقپاراتقا سۇيەنسەك، ەسكەرتكىشتى ورناتۋ باستاماسى تاريح جانە مادەنيەت ەسكەرتكىشتەرىن قورعاۋ جونىندەگى وبلىستىق كوميسسيادان كەلىپ تۇسكەن، كەيىن بۇل ۇسىنىس 2018 جىلى 14 مامىردا مادەنيەت جانە سپورت مينيسترلىگىنە جولدانعان.

"2018 جىلدىڭ 17 شىلدەسىندە ونى مينيسترلىك جانىنداعى مونۋمەنتالدى ونەردىڭ جاڭا قۇرىلىستارىن ورناتۋ جونىندەگى كوميسسيا ماقۇلدايدى. 2019 جىلدىڭ 22 ساۋىرىندە اشىق كونكۋرس جاريالانىپ، سول جىلدىڭ 20 قاراشاسىندا كوميسسيا ءمۇسىنشى اسقار نارتوۆتىڭ جوباسىن تاڭداپ، ەكى جىلدان كەيىن قالالىق مادەنيەت ءبولىمى "بالقىتۋ" جشس-مەن 145 ملن تەڭگەگە شارت جاساسقان. بيىل 72 ملن 499 مىڭ تەڭگە ءبولىنىپ، ول قاراجات تولىق يگەرىلگەن. قالعانى 2022 جىلدىڭ بيۋدجەتىنەن بولىنەدى" دەلىنگەن اكىمدىك تاراتقان حابارلامادا. 

كوركەم قولادان جاسالعان ەسكەرتكىشتىڭ بيىكتىگى – 11 مەتر (ونىڭ تۇعىرى– 5،75 مەتر)، سالماعى – 5 توننا.

ايتا كەتەيىك، باقىتگۇل حامەنوۆا ۇستالعاننان كەيىن ەسكەرتكىشتىڭ سالتاناتتى اشىلۋى 27 جەلتوقسانعا اۋىستىرىلعان بولاتىن.

ەسكە سالا كەتەيىك، اتىراۋ وبلىسى اكىمىنىڭ ورىنباسارى باقىتگۇل حامەنوۆا مەن وبلىستىق مادەنيەت باسقارماسىنىڭ باسشىسى اقىلبەك رىسقالييەۆ اباي ەسكەرتكىشىن ورناتۋعا مەملەكەتتىك ساتىپ الۋ شارتىن جاساعانى ءۇشىن 4،5 ميلليون تەڭگە كولەمىندە پارا الدى دەگەن كۇدىككە ىلىنگەن بولاتىن.

وقي وتىرىڭىز: سوت باقىتگۇل حامەنوۆانى ءۇيقاماققا جىبەرىلۋ سەبەبىن ءتۇسىندىردى