26 جەلتوقسان كۇنى وتەتىن Ninety One، Orda توپتارىنىڭ وففلاين جانە ونلاين فورماتتاعى كونسەرتى قارساڭىندا “Daryn Online” رەسپۋبليكالىق ءبىلىم بەرۋ پلاتفورماسىنىڭ ۇيىمداستىرۋىمەن باسپاسوزگە ارنالعان جيىن ءوتتى.
شاراعا Ninety One توبىنىڭ نەگىزىن قالاۋشى، JUZ Entertainment باسشىسى، پروديۋسسەر ەربولات بەدەلحان، Daryn Online ءبىلىم بەرۋ پلاتفورماسىنىڭ نەگىزىن قالاۋشى ايبەك قۋاتباي، تەلەجۋرناليست اسحات سادىرباي قاتىستى.
الداعى كونسەرتتىڭ ونلاين كورسەتىلىمىن Daryn Online پلاتفورماسى قامتاماسىز ەتەتىن بولادى. ول ءۇشىن ارنايى juz.daryn.online رەسۋرسى ىسكە قوسىلعان. بەلدى پروديۋسەر ونلاين كورسەتىلىمدى ۇيىمداستىرۋشىلاردى ىزدەۋ بارىسىندا تاڭداۋ Daryn Online پلاتفورماسىنا كەزدەيسوق تۇسپەگەنىن ايتادى.
– Daryn online-مەن بىرگە جۇمىس جاساماس بۇرىن بۇل پلاتفورمانى ۇزاق زەرتتەدىم. Daryn Online ۇلكەن اۋديتورياسى بار، ەلىمىزدەگى الدىڭعى قاتارلى IT-كومپانيالاردىڭ ءبىرى. ودان بولەك قۇندىلىقتارىمىز دا ورتاق ەكەن. ول – قازاقشا كونتەنتتى ەكپورتتاۋ، الەمدىك نارىققا شىعۋ، ۇلتقا قىزمەت ەتۋ. ونلاين كونسەرت جاسايىق دەگەن ۇسىنىس تا ءبىزدىڭ تاراپىمىزدان بولدى، – دەدى Ninety One توبىنىڭ پروديۋسسەرى ەربولات بەدەلحان.
ايبەك قۋاتباي الداعى ءىس-شارا ارقىلى ونلاين كونسەرت ۇيىمداستىرۋ مادەنيەتىن قالىپتاستىرۋدى كوزدەيتىنىن اتاپ ءوتتى.
– شەت ەلدە ونلاين كونسەرت كورۋ مادەنيەتى جاقسى قالىپتاسقان. ءبىزدىڭ ماقسات – سول مادەنيەتتى قازاقستاندا قالىپتاستىرىپ، IT-تەحنيكالىق دەڭگەيىمىزدى شەت ەلگە كورسەتۋ. ءقازىردىڭ وزىندە ونلاين-كونسەرتكە بيلەت العانداردىڭ 15%-ىن فيليپپين، مالايزيا، بەلورۋس جانە يندونەزيا ەلدەرىنىڭ وكىلدەرى قۇرايدى. باستامامىز ىزگى جالعاسىن تابادى دەگەن نيەتتەمىن، – دەدى Daryn online ءبىلىم بەرۋ پلاتفورماسىنىڭ نەگىزىن قالاۋشى.
جيىندا قازاقشا كونتەنتتىڭ كەلەشەگى مەن الەمدىك ونەر نارىعىنا ەنۋى جايلى يدەيالار مەن ماسەلەلەر قوزعالىپ، Ninety One توبىنىڭ اقش-قا كەتۋى جايلى دا ايتىلدى.
– ءبىز مۇندا جىلى توسەگىمىز دە قالا بەرسەك بولادى. ءبىراق ءبىز ولاي دامي المايمىز، الەمدىك نارىققا ەنە المايمىز، قازاق ونەرىن ەكسپورتتاي المايمىز. قازىرگى تاڭدا ەلىڭدى، ۇلتىڭدى جارنامالاپ، تانىتۋدىڭ باستى قۇرالى – مۋزىكا. ەندەشە سول مۋزىكا قۇدىرەتىمەن قۇندىلىقتارىمىزدى كوتەرىپ ءارى كورسەتە ءبىلۋىمىز كەرەك، – دەدى ەربولات بەدەلحان ءسوزىن قورىتىندىلاپ.
الداعى كونسەرت JUZ Entertainment پەن Daryn online سەرىكتەستىگىنىڭ باسى ەمەس. بۇعان دەيىن جەلتوقسان ايىنىڭ باسىندا Ninety One توبىنىڭ "DARN" اتتى ءانى مەن سول انگە تۇسىرىلگەن مۋزىكالىق ۆيدەو جارىق كورگەن. تۋىندى جاستاردى دامۋعا، وزدەرىنە سەنۋگە شاقىرادى. كوللابوراسياسىنىڭ ماقساتى – وسكەلەڭ ۇرپاقتى جىگەرلەندىرۋ، قۇندىلىقتاردى ۇمىتپاۋ. ەندىگىدە "DARN" ءانى Daryn online ءبىلىم بەرۋ پلاتفورماسىنىڭ گيمنى سانالادى.
پىكىر قالدىرۋ