زەينەتاقى جيناعىن پايدالانا وتىرىپ، ءۇي ساتىپ الۋ بويىنشا ەڭ قىمبات كەلىسىمشارت – 162،4 ميلليون تەڭگە بولعان. بۇل تۋرالى "وتباسى بانك" اق باسقارما ءتوراعاسى ءلاززات يبراگيموۆا ورتالىق كوممۋنيكاسيالار قىزمەتىندە مالىمدەدى.

– زەينەتاقى جيناعىن پايدالانۋ ارقىلى ەڭ ءىرى سوما – 162،4 ميلليون تەڭگە پرەميۋم ساناتتاعى تۇرعىن ءۇي بولدى. ال ەڭ تومەن مامىلە شامامەن ميلليون تەڭگەگە جۋىق. مۇمكىن بۇل اۋىلدىق جەردە نەمەسە اۋدان ورتالىعىندا تىركەلگەن شىعار، – دەدى باسقارما ءتوراعاسى.

ايتۋىنشا، 2021 جىلى ساتىپ الۋ جانە ساتۋ وپەراسيالارىنىڭ سانى بىلتىرعىمەن سالىستىرعاندا الدەقايدا كوپ بولعان.

–  بۇگىن 179 192 ترانزاكسيا يپوتەكاسىز جۇزەگە اسىرىلدى. ياعني بۇل باسپانانى تولىعىمەن ساتىپ العاندار، – دەدى ءلاززات يبراگيموۆا.

ەسكە سالا كەتەيىك، پرەزيدەنت قاسىم-جومارت توقايەۆ ۇكىمەتكە زەينەتاقى قورىنداعى قاراجاتتى پايدالانۋعا قاتىستى شەكتى مەجەنى كوتەرۋ مەرزىمىن 2022 جىلدىڭ 1 ساۋىرىنە دەيىن ۇزارتۋدى تاپسىرعان بولاتىن.