اتىراۋ وبلىسى اكىمىنىڭ ورىنباسارى باقىتگۇل حامەنوۆا تەرگەۋ يزولياتورىنا قامالدى. بۇل تۋرالى اق جايىق باسىلىمى حابارلادى.

باسىلىم تاراتقان اقپاراتقا قاراعاندا، 22 جەلتوقساندا اتىراۋ وبلىستىق سوتى باقىتگۇل حامەنوۆانى ەكى ايعا قاماۋعا الۋعا سانكسيا بەرگەن. ەندى ول سوتقا دەيىن تەرگەۋ يزولياتورىندا بولادى.

حامەنوۆانى تۇتقىنداۋ تۋرالى سۇراۋدى اتىراۋ وبلىسىنىڭ پروكۋراتۋراسى سالعان.

ەسكە سالا كەتەيىك، 10 جەلتوقسان كۇنى اتىراۋ وبلىسى اكىمىنىڭ ورىنباسارى باقىتگۇل حامەنوۆا مەن وبلىستىق مادەنيەت باسقارماسىنىڭ باسشىسى اقىلبەك رىسقالييەۆ 4،5 ملن تەڭگە كولەمىندە پارا الدى دەگەن كۇدىكپەن ۇستالعان. ولار  اباي ەسكەرتكىشىن ورناتۋعا مەملەكەتتىك ساتىپ الۋ شارتىن جاساعانى ءۇشىن 4،5 ميلليون تەڭگە كولەمىندە پارا الدى دەگەن كۇدىككە ىلىنگەن.

كەيىن 12 جەلتوقساندا اتىراۋ قالاسىنىڭ مامانداندىرىلعان تەرگەۋ سوتى حامەنوۆانى ءۇيقاماققا الۋ تۋرالى شەشىم شىعارعان. ءقازىر اتالعان ءىس قىلمىستىق كودەكستىڭ 366-بابى 2-بولىگى (قوماقتى مولشەردە پارا الۋ) بويىنشا تەرگەلىپ جاتىر.