قاراعاندى وبلىسىنداعى شارۋا قوجالىقتىڭ بىرىندە مال جاپپاي بەلگىسىز دەرتكە شالدىعىپ جاتىر. مالشىلار ءىرى قاراعا ەكى جىل بويىنا بىردە-بىر ەكپە سالىنباعانىن، ەندى ونىڭ زاردابىن كورىپ جاتقاندارىن جەتكىزدى، دەپ حابارلادى استانا ارناسى.

تەلاارنا مالىمەتىنشە، شەت اۋدانىندا بۇگىندە اۋرۋعا شالدىققان ءىرى قارا سانى 800-گە جەتكەن. جەرگىلىكتى ۆەتەرينارلار مالشىلاردىڭ پايىمىنا قارسى ءۋاج ايتا الماعان. ويتكەنى تەگىن ءدارى الۋعا مەملەكەتتەن قارجى بولىنبەگەن.

ساۋلە، قاراعاندى وبلىسى اقجال كەنتىنىڭ ساۋلە ەسىمدى تۇرعىنى مالعا ۆاكسينا سالىنباعانىنا 2 جىل بولعانىن ايتادى.

– مال ابدەن اۋىرعان سوڭ شاقىرتتىق. سول كەزدە كەلىپ ۆاكسينا سالىپ كەتتى. ءبىراق قالعان ۆاكسينا مەن ۆيتاميندەردى ءوزىمىز ساتىپ الىپ سالدىق. تەگىن بە دەپ سۇرادىق، دارىگەر "وزدەرىڭىز ساتىپ الاسىزدار، بىزگە ونداي اقشا بولىنگەن جوق" دەدى.

مال اۋرۋى شەت اۋدانىنىڭ اقجال كەنتىنەن باسقا اقشاتاۋ، كيىكتى، اقسۋ-ايۋلى، بوساعا اۋىلدارى مەن مويىنتى كەنتىندە جاپپاي ورشىگەن. سيىرلار مەن بۇزاۋلاردىڭ اۋىزدارىنان سۋ اعىپ، جەم- ءشوپ جەي الماي جاتىپ قالعان. مۇنداي جاعداي العاش قاراشانىڭ ورتاسىندا بايقالعان. 6 مال ارام قاتقان. الايدا اۋىلدىقتار ودان دا كوپ سيىر قىرىلۋى مۇمكىن دەپ وتىر.

ۆەتەرينار ماماندار بەلگىسىز دەرت ەتەك العانىن راستاعان.