سانيتاريالىق-ەپيدەميولوگيالىق باقىلاۋ كوميتەتى نۇر-سۇلتان قالاسى كوروناۆيرۋستىڭ تارالۋ قارقىنى بويىنشا "جاسىل" ايماقتان "سارى" ايماققا وتكەنىن حابارلادى.

قالا 15 جەلتوقساننان بەرى "جاسىل" ايماقتا بولعان. الايدا كوروناۆيرۋس جۇقتىرۋشىلار سانى قايتا ارتتىپ، قالا "سارى" ايماققا وتكەن.

سىرقاتتانۋ كورسەتكىشى الدىڭعى اپتاعا قاراعاندا 4%-عا جوعارى بولعان.

ەپيدەميولوگيالىق باقىلاۋ كوميتەتى اۋرۋ كوبەيۋىنىڭ نەگىزگى سەبەپتەرىن ادەتتەگىدەي مەرەكە كۇندەرى كەيبىر تۇرعىنداردىڭ كارانتيندىك شەكتەۋلەردى ساقتاماۋىمەن بايلانىستىرادى.

سايكەسىنشە، استانادا شەكتەۋ شارالارى كۇشەيە ءتۇستى. ماسەلەن، جاپپاي ءىس-شارالارعا، ونىڭ ىشىندە وتباسىلىق، كورپوراتيۆتىك ءىس-شارالارعا، ءتۇرلى توپتار مەن ۇيىمدار بالالارىنىڭ قاتىسۋىمەن جالپىمەكتەپتىك جانە ۇجىمدىق تاڭەرتەنگىلىكتەردى ۇيىمداستىرۋعا جانە وتكىزۋگە تىيىم سالىنادى. مەرەكەگە وراي مونيتورينگتىك توپتاردىڭ جۇمىسى كۇشەيەدى.