اتىراۋ وبلىستىق سوتىنىڭ باسپا ءسوز قىزمەتى باقىتگۇل حامەنوۆانى ەكى ايعا قاماۋعا الۋ تۋرالى شەشىمىن ءتۇسىندىردى. 

پروكۋروردىڭ ءوتىنىشى بويىنشا اتىراۋ وبلىستىق سوتىنىڭ قىلمىستىق ىستەر جونىندەگى سوت القاسى وبلىس اكىمىنىڭ ورىنباسارى باقىتگۇل حامەنوۆانى ءۇيقاماققا الۋ تۋرالى اتىراۋ قالاسى مامانداندىرىلعان تەرگەۋ سوتىنىڭ 12 جەلتوقسانداعى قاۋلىسىنىڭ كۇشىن جويدى. جاڭا قاۋلى بويىنشا حامەنوۆا ەكى ايعا قاماۋعا الىندى.

"سوت القاسى باقىتگۇل حامەنوۆانى قىلمىستىق كودەكستىڭ 366-بابى 3-بولىگى 2-تارماعىندا (زاڭسىز ارەكەتتەرى ءۇشiن پارا الۋ) كوزدەلگەن اۋىر سىبايلاس جەمقورلىق قىلمىسىن جاسادى دەپ ايىپتاۋدا. ول وبلىستا باسشىلىق قىزمەت اتقارعاندىقتان جانە باسقا دا الەۋمەتتىك بايلانىستارى بولعاندىقتان، قىلمىستىق ءىستىڭ وزگە دە تۇلعالارىنا اسەر ەتىپ، ءىستىڭ وبەكتيۆتى تەرگەلۋىنە كەدەرگى كەلتىرۋى مۇمكىن" دەلىنگەن حابارلامادا.

ەگەر ب.حامەنوۆانىڭ قىلمىسى دالەلدەنسە، ونىڭ مۇلكى تاركىلەنىپ، 7 جىلدان 12 جىلعا دەيىن باس بوستاندىعىنان ايىرىلۋى مۇمكىن.

باقىتگۇل حامەنوۆا 22 جەلتوقساندا تەرگەۋ يزولياتورىنا قامالعان.

10 جەلتوقسان كۇنى  باقىتگۇل حامەنوۆا مەن وبلىستىق مادەنيەت باسقارماسىنىڭ باسشىسى اقىلبەك رىسقالييەۆ 4،5 ملن تەڭگە كولەمىندە پارا الدى دەگەن كۇدىكپەن ۇستالعان. ولار  اباي ەسكەرتكىشىن ورناتۋعا مەملەكەتتىك ساتىپ الۋ شارتىن جاساعانى ءۇشىن 4،5 ميلليون تەڭگە كولەمىندە پارا الدى دەگەن كۇدىككە ىلىنگەن.