ەلوردادا سيمفونيالىق وركەستردىڭ سۇيەمەلدەۋىمەن جانە ۆوكالدىق ورىنداۋدا قازاق تىلىندە Disneyء-دىڭ ليسەنزيالانعان «جۇلدىزدار شەرۋى» كينوكونسەرتى ءوتتى. كونسەرتتىك باعدارلاما قازاقستان ءۇشىن ارنايى جاسالىپ، كورەرمەندەرگە «بولاشاق» قورىنىڭ باستاماسىمەن مەملەكەتتىك تىلگە دۋبلياجدالعان ايگىلى كينوكارتينالاردىڭ كومپوزيسيالارى ۇسىنىلدى.

«بولاشاق» قورىنىڭ قامقورشىلىق كەڭەسىنىڭ قۇرمەتتى مۇشەسى باۋىرجان بايبەك جينالعانداردى تاۋەلسىزدىكتىڭ 30 جىلدىعىمەن قۇتتىقتاي وتىرىپ، تۇڭعىش پرەزيدەنت نۇرسۇلتان نازاربايەۆتىڭ باستاماسىمەن قولعا الىنعان «بولاشاق» ستيپەندياسىنىڭ ارقاسىندا مىڭداعان قازاقستاندىق جاستاردىڭ الەمنىڭ جەتەكشى وقۋ ورىندارىندا ءبىلىم الۋعا قولى جەتكەنىن اتاپ ءوتتى. 2011 جىلى باعدارلاما تۇلەكتەرى قور قۇرعان بولاتىن. اتالعان قوردىڭ قايىرىمدىلىق جانە ءبىلىم باعدارلامالارىنان بولەك تاعى ءبىر باعىتى مەملەكەتتىك ءتىلدىڭ قولدانىسىن كەڭەيتۋ باستاماسى بولدى. 

«2011 جىلى ءبىز تىكەلەي ەلباسىنىڭ قولداۋىمەن «وزىڭنەن باستا» جوباسىن قولعا العان ەدىك. بۇگىندە قازاق تىلىندەگى ساپالى ءارى باسەكەگە قابىلەتتى كونتەنتتى ەلىمىزدىڭ بالالارى عانا ەمەس، سونىمەن قاتار الەمدەگى وتانداستارىمىز دا كورۋ مۇمكىندىگىنە يە بولدى. وزدەرىڭىزگە ءمالىم، «بولاشاق» قورى اۋتيست بالالاردىڭ ماسەلەلەرىمەن دە بەلسەندى تۇردە اينالىسىپ ءجۇر. بىرنەشە جىلدىڭ ىشىندە ءبىز كوپتەگەن ينكليۋزيانى قولداۋ كابينەتتەرىن اشتىق. بۇگىن وسى زالدا دا ەرەكشە قاجەتتىلىكتەرى بار بالالار قاتىسىپ وتىر. ءاربىر ساتىلعان بيلەتتەن تۇسكەن قاراجات ينكليۋزيۆتى ءبىلىم بەرۋ جوبالارىن دامىتۋعا جۇمسالاتىن بولادى»، – دەدى باۋىرجان بايبەك.

كينوكونسەرت بارىسىندا Nazima، دينارا سۇلتان، گۇلسىم مىرزابەكوۆا، Ayree، دانيار وتەگەن، يندي ەدىلبايەۆا جانە باسقا دا انشىلەر Disneyء-دىڭ كلاسسيكالىق تۋىندىلارى – «ارىستان پاتشا»، «سۋ پەرىسى»، «مۋلان»، «الاددين»، «پوكاحونتاس»، سونداي-اق «مۇزدى ولكە»، «موانا»، «اڭدار شاھارى» سەكىلدى زاماناۋي انيماسيالىق فيلمدەردىڭ ايگىلى كومپويزسيالارىن ورىندادى. شىعارمالار «استانا بالەت» تەاترىنىڭ سيمفونيالىق وركەسترىنىڭ سۇيەمەلدەۋىمەن شىرقالدى. وركەستردىڭ باس ديريجەرى – ارمان ورازعالييەۆ.

«وسىناۋ عاجايىپ كونسەرت – قوردىڭ 10 جىلدىق مەرەيتويىنىڭ قۇرمەتىنە وراي ەلوردا تۇرعىندارىنا جاساعان تارتۋى. بۇل مۋلتيمادەني ءىس-شارا بالالاردى سۇيىكتى مۋلتفيلمدەرى ارقىلى كلاسسيكالىق اسپاپتىق مۋزىكا تىڭداۋعا ىنتالاندىرا وتىرىپ، انا ءتىلىمىزدىڭ بايلىعى مەن شۇرايلىلىعىن پاش ەتەدى. كينوكونسەرت ءبىزدىڭ قازاق تىلىندە ساپالى كونتەنت جاساۋ بويىنشا ۇزاق جىلعى جۇمىسىمىزدىڭ جالعاسى بولىپ وتىر. وسىناۋ جوبالارعا 1،5 ملرد. تەڭگە بولگەن 22 كومپانيانىڭ دەمەۋشىلىك كومەگىنىڭ ارقاسىندا جەتەكشى كينوكومپانيالاردىڭ 38 ءفيلمى دۋبلياجدالدى»، – دەپ اتاپ ءوتتى قوردىڭ قامقورشىلىق كەڭەسىنىڭ ءتوراعاسى دينارا گاپلان.