ءبىلىم جانە عىلىم ءمينيسترى اسحات ايماعامبەتوۆ پەداگوگتەردى جۇمىسقا قابىلداۋدىڭ جاڭا ەرەجەلەرىن ءتۇسىندىردى. بۇل تۋرالى ول الەۋمەتتىك جەلىدەگى پاراقشاسىندا مالىمدەدى.
ءمينيستردىڭ ايتۋىنشا، ەندى پەداگوگتەردى جۇمىسقا قابىلداۋ جاڭا فورماتتا كونكۋرس جانە ناقتى كريتەرييلەر بويىنشا جۇزەگە اسىرىلاتىن بولادى.
– وزگەرىستەر مۇعالىمدەردى جۇمىسقا ورنالاستىرۋ كەزىندە اشىقتىقتى قامتاماسىز ەتۋگە، سىبايلاس جەمقورلىق تاۋەكەلدەرىن جويۋعا جانە جۇمىسقا قابىلداۋ كەزىندە مەريتوكراتيا قاعيدالارىن قامتاماسىز ەتۋگە باعىتتالعان. بۇعان دەيىن ناقتى ەرەجە بولعان جوق، ياعني مەكتەپ ديرەكتورى كىمدى جانە قانداي كورسەتكىشتەر بويىنشا جۇمىسقا قابىلداۋ كەرەكتىگى تۋرالى ءوزى شەشەتىن، – دەدى ول.
ول ءبىرقاتار ايماقتا ساعاتتار سانى دۇرىس بولىنبەي، ءۇش-تورت ءمۇعالىم ءبىر ستاۆكاعا قابىلدانعان جاعدايلار دا تىركەلگەنىن اتاپ ءوتتى.
بۇدان بىلاي ءبىلىم بەرۋ ۇيىمدارى بارلىق بوس نەمەسە ۋاقىتشا بوس لاۋازىمدارعا كونكۋرس وتكىزەتىن بولادى. بۇل شاعىن جيناقتى مەكتەپتەرگە قاتىستى ەمەس.
بايقاۋعا بىلىكتىلىك سيپاتتامالارىنا سايكەس كەلەتىن مۇعالىمدەر قاتىسادى.
– جۇمىسقا ورنالاسۋ كەزىندە ۇمىتكەر كونكۋرسقا قاتىسۋ تۋرالى ءوتىنىش بەرەدى. ءوتىنىش بەرۋشى ءوزىنىڭ باعالاۋ پاراعىن قوسا ۇسىنادى. وندا بارلىق جەتىستىگى، ناتيجەلەرى، ەڭبەك ءوتىلى، اكىمشىلىك نەمەسە ادىستەمەلىك قىزمەت تاجىريبەسى، كۋرستىق دايىندىق جانە باسقا دا اقپارات كورسەتىلەدى. ءاربىر باعىت بويىنشا كانديدات بەلگىلەنگەن كريتەرييلەر ارقىلى باعالاۋ شكالاسىنا سايكەس ءوز بالىن دەربەس قويادى.
كونكۋرستىق كوميسسيا ءوتىنىش بەرۋشىنىڭ ءوزى قويعان بالدىڭ، ولاردى راستايتىن قۇجاتتاردىڭ سايكەستىگىن تەكسەرىپ، قورىتىندى ۇپاي شىعارادى. ناتيجەسىندە بوس ورىنعا ەڭ كوپ بالل جيناعان ۇمىتكەر قابىلدانادى. سۋبەكتيۆيزم دەڭگەيى بارىنشا تومەندەيدى، – دەدى مينيستر اسحات ايماعامبەتوۆ.
پىكىر قالدىرۋ