ءماجىلىسىنىڭ دەپۋتاتى، "Nur Otan" پارتياسى فراكسياسىنىڭ مۇشەسى ەلنۇر بەيسەنبايەۆ ونلاين نەسيە بەرۋ كەزىندەگى قاۋىسىزدىك شارالارىن كۇشەيتۋگە بايلانىستىر قارجى نارىعىن رەتتەۋ جانە دامىتۋ جونىندەگى اگەنتتىك ءتورايىمى مادينا ءابىلقاسىموۆاعا دەپۋتاتتىق ساۋال جولدادى.

دەپۋتات ەل بويىنشا ونلاين-قىزمەتتەردىڭ كوبەيۋىنە قاتىستى ينتەرنەت الاياقتىق وتكەن جىلمەن (10،2 مىڭ) سالىستىرعاندا 2 ەسەگە ارتىپ، 17،8 مىڭنان استام ىسكە جەتكەنىن، بۇل ىستەردىڭ اياسىندا 25 مىڭ ادام 8،2 ملرد تەڭگەدەن استام قارجىعا زارداپ شەككەنىن ايتتى.

سونداي-اق ول وسىدان 7 اي بۇرىن حالىققا ونلاين نەسيە بەرۋمەن بايلانىستى الاياقتىق جاعدايلارىنىڭ جيىلەپ كەتكەنىن كوتەرىپ، ارنايى دەپۋتاتتىق ساۋال مەن ناقتى ءىس-شارالار تىزبەگىن ۇسىنىلعانىنا قاراماستان، قابىلدانعان ءىس-شارالار ءتىزىمى ءالى دە، اگەنتتىك تاراپىنان جۇمىس ءبىرىزدى جۇيەگە قويىلماعانىن اڭعارتاتىنىن اتاپ ءوتتى.

– جۋىردا عانا ەلوردالىق تۇرعىن وزگە ادامداردىڭ جەكە قۇجاتتارىن پايدالانۋ ارقىلى الماتى، اتىراۋ، نۇر-سۇلتان قالالارىنىڭ ازاماتتارىنا، ولاردىڭ قاتىسۋىنسىز 10 ميلليون تەڭگە ونلاين-نەسيە راسىمدەگەن. ازاماتتاردىڭ سەنىمىنە زاڭگەرلىك كومەك كورسەتۋ ارقىلى كىرىپ، ولاردىڭ جەكە اقپاراتتارىنا يە بولعان. ودان بولەك، الماتىلىق جاس ازامات Kcell تەلەفون وپەراتورى تۇتىنۋشىلارىنىڭ اتىنان 2 ميلليوننان استام تەڭگەنى قۇرايتىن 5 زاماناۋي سمارتفوندى ونلاين راسىمدەگەن. بۇل ەكى مىسالدىڭ سوراقىلىعى، مۇددەلى ازاماتتىڭ قاتىسۋىنسىز، ياعني ونىڭ جەكە دەرەكتەرىن پايدالانۋ ارقىلى نەسيەنىڭ راسىمدەلۋىندە. وزدەرىڭىزگە ءمالىم، 2019 جىلدان باستاپ كەز-كەلگەن تۇرعىن ءوزىنىڭ SIM كارتاسىن جسن ءنومىرى ارقىلى ءوز اتىنا تىركەۋ مىندەتتەلگەن. سوعان قاراماستان، الاياقتار ءۇشىنشى ادامعا وزگە ءنومىردى قولدانۋ ارقىلى اتالعان قىلمىستى قينالماي ورىنداپ كەلەدى. جوعارىداعى كورسەتىلگەن ناقتى مىسالدار جەكە تۇلعانى سايكەستەندىرۋ راسىمدەرىن رەتتەۋ جۇيەلەرىنىڭ تولىق پىسىقتالماعانىن كورسەتىپ تۇر، –  دەگەن دەپۋتات جاۋاپتى مەملەكەتتىك ورگاندارعا كليەنتتىڭ سايكەستەندىرۋىن انىقتاۋدى كۇشەيتۋ بولىگى بويىنشا ونلاين نەسيەلەر بەرۋدەگى راسىمدەرگە قوسىمشا تومەندەگىدەي ۇسىنىستار ەنگىزۋدى سۇرايدى.

– بىرىنشىدەن، اگەنتتىككە ءتيىستى مەملەكەتتىك ورگاندارمەن بىرلەسىپ ونلاين كرەديتتى راسىمدەۋ بارىسىنداعى ونىڭ جەكە دەرەكتەرى مەن تەلەفون ءنومىرىنىڭ وپەراتور جەلىسىمەن يندەنتيفيكاسيا جاسالۋىن ەنگىزۋدى؛ سونداي-اق، تەز ارادا بارلىق ميكروقارجىلىق ۇيىمداردىڭ «سايكەستەندىرۋ دەرەكتەرىمەن الماسۋ ورتالىعىنىڭ» اقپاراتىمەن يدەنتيفيكاسيا جاساۋدى ۇيىمداستىرۋدى سۇرايمىز. ەكىنشىدەن، كوتەرىلگەن ماسەلەنىڭ قاۋىپتىلىگىن ەسكەرە كەلە، باس پروكۋراتۋرا جانە ءتيىستى قۇقىق قورعاۋ ورگاندارىمەن بىرلەسە ينتەرنەت-الاياقتىقتى جويۋ بويىنشا جەدەل ارەكەت ەتۋ قادامدارىن ۇيىمداستىرۋدى سۇرايمىز، – دەدى ول.