قۇرامىندا پرەزيدەنت اكىمشىلىگىنىڭ قىزمەتكەرلەرى بار ۇكىمەتتىك كوميسسيا اقتاۋدا جۇمىسقا كىرىستى. بۇل تۋرالى مەملەكەت باسشىسى قاسىم-جومارت توقايەۆ twitter پاراقشاسىندا حابارلادى.

"رەسپۋبليكالىق وپەراتيۆتىك شتاب تۇراقتى نەگىزدە جۇمىس ىستەپ جاتىر. كوميسسياعا ەلىمىزدەگى تۇراقتىلىقتى ساقتاي وتىرىپ، تۋىنداعان ماسەلە بويىنشا ءوزارا ءتيىمدى شەشىم شىعارۋ جۇكتەلدى. قۇقىق قورعاۋ ورگاندارىنا قوعامدىق ءتارتىپتىڭ بۇزىلۋىنا جول بەرمەۋ جونىندە تاپسىرما بەرىلدى. دەمونسترانتتار جاۋاپكەرشىلىك تانىتىپ، ديالوگقا دايىن بولۋعا ءتيىس"،  دەپ جازدى پرەزيدەنت.

ماڭعىستاۋ وبلىسى جاڭاوزەن، اقتاۋ قالالارىندا اۆتوموبيلگە ارنالعان سۇيىتىلعان گازدىڭ قىمباتتاۋىنا بايلانىستى تۇرعىندار 3 كۇن قاتارىنان نارازىلىققا شىعىپ جاتىر.

ۇكىمەت گاز باعاسىن كاسىپكەرلەر ەسەبىنەن 120 تەڭگەدەن 85-90 تەڭگەگە دەيىن تۇسىرۋگە ءازىر ەكەنىن ءمالىم ەتتى. الايدا تۇرعىندار گاز باعاسى بۇرىنعىداي 50 تەڭگە كەلگەنىن قالايدى.

ميتينگتە "ۇكىمەت وتستاۆكاعا كەتسىن" دەگەن تالاپتار دا ايتىلىپ جاتىر.