اتىراۋ وبلىسىنداعى تەڭىز مۇناي-گاز كەنىشىندە جۇمىسشىلار ماڭعىستاۋ وبلىسىنداعى نارازىلىق اكسياسىنا شىققانداردى قولداپ، ەرەۋىلگە شىققانى حابارلاندى.

الەۋمەتتىك جەلىلەردەگى ۆيدەودان مۇناي-گاز وندىرەتىن كومپانيا اۋماعىندا جۇزدەگەن ەر ادامنىڭ ارنايى جۇمىس كيىمىندە ءبىر باعىتقا قاراي قوزعالىپ بارا جاتقانىن كورۋگە بولادى.

"تەڭىز ەرەۋىلدە! ءبىز ماڭعىستاۋدى قولدايمىز!" – دەپ ۇرانداتىپ جاتىر نارازىلىق بىلدىرۋشىلەر.

ماڭعىستاۋ وبلىسى جاڭاوزەن، اقتاۋ قالالارىندا اۆتوموبيلگە ارنالعان سۇيىتىلعان گازدىڭ قىمباتتاۋىنا بايلانىستى تۇرعىندار 3 كۇن قاتارىنان نارازىلىققا شىعىپ جاتىر.

ۇكىمەت گاز باعاسىن كاسىپكەرلەر ەسەبىنەن 120 تەڭگەدەن 85-90 تەڭگەگە دەيىن تۇسىرۋگە ءازىر ەكەنىن ءمالىم ەتتى. الايدا تۇرعىندار گاز باعاسى بۇرىنعىداي 50 تەڭگە كەلگەنىن قالايدى.

ميتينگتە "ۇكىمەت وتستاۆكاعا كەتسىن" دەگەن تالاپتار دا ايتىلىپ جاتىر.