بۇگىن اتىراۋدا تۇسكى ۋاقىتتان كەيىن 5 مىڭنان استام تۇرعىن يساتاي مەن ماحامبەت ورتالىق الاڭدارىنا جينالدى. ولار  جاڭاوزەندىكتەرگە قولداۋ ءبىلدىرىپ، «شال كەت»، «باعا ارزانداسىن!» دەپ تالاپ قويىپ جاتىر. بۇل تۋرالى اق جايىق باسىلىمى حابارلادى.

پوليسيا مەن ارنايى جاساق جولدى جاۋىپ تاستاعانىمەن، شەرۋشىلەر قورشاۋدى بۇزىپ ءوتتى. پوليسيا نارازىلىق بىلدىرۋشىلەردىڭ ءبىرىن ۇستاعاننان كەيىن نارازى حالىق پەن پوليسيا اراسىندا قاقتىعىس بولدى. ناتيجەسىندە اۆتوزاكتى توقتاتىپ، ىشىندەگى ۇستالعان ازاماتتاردى بوساتىپ الدى.

قازىرگى ۋاقىتتا الاڭدا بىردە-بىر شەنەۋنىك جوق. پوليسيانى جەرگىلىكتى پوليسيا قىزمەتىنىڭ باسشىسى الىبەك قايىروۆ باسقارادى. جينالعان ازاماتتار ازىق-تۇلىك پەن جانار-جاعارماي باعاسىن تومەندەتۋدى تالاپ ەتۋدە.پوليسيا بىرنەشە نەگىزگى كوشەلەردى جاۋىپ قويعانىنا قاراماستان، نارازىلىق بىلدىرۋشىلەر سانى سەكۋند سايىن ارتىپ كەلەدى.

ەسكە سالايىق، ماڭعىستاۋ وبلىسى جاڭاوزەن، اقتاۋ قالالارىندا اۆتوموبيلگە ارنالعان سۇيىتىلعان گازدىڭ قىمباتتاۋىنا بايلانىستى تۇرعىندار 3 كۇن قاتارىنان نارازىلىققا شىعىپ جاتىر.

ۇكىمەت گاز باعاسىن كاسىپكەرلەر ەسەبىنەن 120 تەڭگەدەن 85-90 تەڭگەگە دەيىن تۇسىرۋگە ءازىر ەكەنىن ءمالىم ەتتى. الايدا تۇرعىندار گاز باعاسى بۇرىنعىداي 50 تەڭگە كەلگەنىن قالايدى.

ميتينگتە "ۇكىمەت وتستاۆكاعا كەتسىن" دەگەن تالاپتار دا ايتىلىپ جاتىر.

پرەزيدەنت قاسىم-جومارت توقايەۆتىڭ تاپسىرماسى بويىنشا ۇكىمەتتىك كوميسسيا مۇشەلەرى ماڭعىستاۋداعى بەلسەندىلەرمەن كەلىسسوز جۇرگىزۋدە.