پرەزيدەنت قاسىم-جومارت توقايەۆ نارازىلىق بىلدىرۋشىلەردى دەسترۋكتيۆتى توپتاردىڭ ۇندەۋىنە قۇلاق اسپاۋعا شاقىردى. بۇل تۋرالى ول ءوزىنىڭ Twitter پاراقشاسىندا جازدى.
"ۇكىمەت ءوز وكىلەتتىگىنىڭ اياسىندا ەلدەگى تۇراقتىلىقتى قامتاماسىز ەتۋ ماقساتىمەن ماڭعىستاۋ وبلىسىندا سۇيىتىلعان گاز باعاسىنىڭ ءار ءليترىن 50 تەڭگەگە دەيىن تومەندەتۋ تۋرالى شەشىم قابىلدادى"، "دەمونسترانتتاردى ەلىمىزدىڭ تۇتاستىعى مەن بىرلىگىنە سىزات ءتۇسىرۋدى كوزدەيتىن دەسترۋكتيۆتى توپتاردىڭ ۇندەۋىنە قۇلاق اسپاۋعا شاقىرامىن. باسقا دا الەۋمەتتىك-ەكونوميكالىق تالاپتار ەرتەڭگى ەلوردادا وتەتىن كەڭەس بارىسىندا جەكە قاراستىرىلادى"، دەپ جازدى پرەزيدەنت.
ەسكە سالايىق، بىرەر ساعات بۇرىن قازاقستان پرەمەر-مينيسترىنىڭ ورىنباسارى ەرالى توعجانوۆ اقتاۋدا الاڭعا جينالعان حالىققا كوميسسيانىڭ شەشىمىن جاريالادى. ول گاز باعاسى ليترىنە 50 تەڭگەگە دەيىن تومەندەيتىنىن مالىمدەدى. بۇل "قازمۇنايگاز" ۇك اق الەۋمەتتىك جاۋاپكەرشىلىگى اياسىندا جۇزەگە اسىرىلادى.
سونداي-اق الاڭدا بولعان ادامداردى جاۋاپكەرشىلىككە تارتپاۋ تۋرالى كەپىلدىك بەرىلدى.
تاراپتار تۋىندايتىن بارلىق ماسەلەنى سىندارلى ديالوگ ارقىلى جانە قولدانىستاعى زاڭناما شەڭبەرىندە شەشۋگە ۋاعدالاسقانى حابارلاندى.
5 قاڭتار ق.توقايەۆ ەلدەگى الەۋمەتتىك-ەكونوميكالىق ماسەلەگە قاتىستى جيىن وتكىزەدى.
پىكىر قالدىرۋ