الماتىدا "دەموكراتيالىق پارتيا" باستاماشىل توبىنىڭ جەتەكشىسى جانبولات مامايدى سوققىعا جىعىلعانى حابارلاندى. بۇل تۋرالى بەلسەندىنىڭ جۇبايى ينگا يمانباي مەن ادۆوكاتى جانار بالعابايەۆا facebook-تەگى پاراقشاسىندا مالىمدەدى.

ادۆوكاتىنىڭ ايتۋىنشا، ماماي ۇيىمداستىرعان نارازىلىق اكسياسى «الماتى ارەنا» سپورت كەشەنىنىڭ ماڭىندا ءوتىپ، وعان بىرنەشە مىڭ ادام قاتىسقان. شەرۋشىلەر گاز بەن ازىق-تۇلىك باعاسىنىڭ وسۋىنە قارسىلىق بىلدىرگەن. مامايدى كەيبىر دەرەكتەر بويىنشا ناۋرىزباي اۋداندىق پوليسيا بولىمىنە الىپ كەتكەن. الايدا  بالعيبايەۆانىڭ ايتۋىنشا، بەلسەندى ول جەردە بولماعان.  بەلسەندى ءقازىر اۋەزوۆ اۋداندىق پوليسيا بولىمىنە جەتكىزىلگەن بولىپ شىقتى.

جانبولات مامايدىڭ ايەلى ينگا يمانباي ازاتتىق راديوسىنا پوليسيانىڭ كۇيەۋىن قايدا قاماعانىن ايتپاي وتىرعانىن، ونىڭ دەنساۋلىعىنا الاڭدايتىنىن جەتكىزدى. 

– مەن جانە جانبولات ماماي اۋەزوۆ اۋداندىق بولىمشەسىندەمىز. جانبولاتتى كادىمگەدەي ۇرعان. كوزى كوگەرگەن. ءبىر جىگىتتىڭ باسىنان قان توقتاماي جاتىر. ءبارلىقتارىمىزدىڭ ءۇستى-باسىمىز كىر توپراق، – دەدى بەلسەندى اسحات دەموكرات Facebook پاراقشاسىندا.

ەسكە سالايىق، بۇگىن قازاقستان پرەمەر-مينيسترىنىڭ ورىنباسارى ەرالى توعجانوۆ اقتاۋدا الاڭعا جينالعان حالىققا كوميسسيانىڭ شەشىمىن جاريالادى. ول گاز باعاسى ليترىنە 50 تەڭگەگە دەيىن تومەندەيتىنىن مالىمدەدى. بۇل "قازمۇنايگاز" ۇك اق الەۋمەتتىك جاۋاپكەرشىلىگى اياسىندا جۇزەگە اسىرىلادى.

سونداي-اق الاڭدا بولعان ادامداردى جاۋاپكەرشىلىككە تارتپاۋ تۋرالى كەپىلدىك بەرىلدى.

تاراپتار تۋىندايتىن بارلىق ماسەلەنى سىندارلى ديالوگ ارقىلى جانە قولدانىستاعى زاڭناما شەڭبەرىندە شەشۋگە ۋاعدالاسقانى حابارلاندى.

الايدا حالىق نارازىلىعى باسىلار ەمەس. جاڭاوزەن، اقتاۋ، اتىراۋ، اقتوبە سەكىلدى ءىرى نارازىلىق وشاقتارىنا ەندى الماتى قوسىلدى. قازىرگى ۋاقىتتا مىڭداعان ادام الماتى-ارەنا سپورت كەشەنى ماڭىنا جينالىپ، ۇكىمەت پەن قاۋىپسىزدىك كەڭەسىنىڭ ءتوراعاسى  نۇرسگلتان نازاربايەۆتىڭ وتستاۆكاسىن تالاپ ەتىپ تۇر.

5 قاڭتار ق.توقايەۆ ەلدەگى الەۋمەتتىك-ەكونوميكالىق ماسەلەگە قاتىستى جيىن وتكىزەدى.