قاسىم-جومارت توقايەۆ ءوز سوزىندە ينفلياسياعا جول بەرمەۋ اتقارۋشى بيلىكتىڭ باستى مىندەتتەرىنىڭ ءبىرى ەكەنىن، ءبىراق ونىڭ ورىندالماعانىن ايتتى.

– بۇل ەل ۇكىمەتىنىڭ كەلەسى قۇرامىنىڭ جانە مينيسترلەر كابينەتىنىڭ جاڭا باسشىسىنىڭ ەڭ باستى  مىندەتى بولادى، – دەدى پرەزيدەنت.

قاسىم-جومارت توقايەۆ ەلىمىزدە قالىپتاسقان كۇردەلى قوعامدىق-ساياسي جانە الەۋمەتتىك-ەكونوميكالىق جاعدايعا توقتالىپ، سۇيىتىلعان گاز باعاسىنىڭ ارتۋىنا بايلانىستى حالىقتىڭ نارازىلىعىن تۋدىرعانى ءۇشىن ۇكىمەت، سونىڭ ىشىندە، ەنەرگەتيكا مينيسترلىگى، سونداي-اق «قازمۇنايگاز» بەن «قازاقگاز» كاسىپورىندارى كىنالى ەكەنىن ايتتى.

پرەزيدەنت ءوزىنىڭ بىلتىر ماۋسىم ايىندا، ماڭعىستاۋ وبلىسىنداعى «قازاق گاز وڭدەۋ زاۋىتى» بازاسىندا سۇيىتىلعان گاز وندىرەتىن جاڭا زاۋىت سالۋ جونىندە بەرگەن تاپسىرماسىنىڭ ورىندالۋ بارىسىن سىنعا الدى.

– قازىرگى ۋاقىتتا جوبانىڭ تەك تەحنيكالىق-ەكونوميكالىق نەگىزدەمەسى عانا دايىندالعان. ونى قارجىلاندىرۋ ماسەلەسى شەشىلمەگەن. ەكىنشىدەن، سۇيىتىلعان گازدى تاراتۋ جانە ساۋداعا شىعارۋدىڭ قازىرگى ءتارتىبى پىسىقتالماعان. ەلەكتروندى ساۋدا بارىسىندا باعانىڭ ءوسۋىن شەكتەۋ تەتىكتەرى قاراستىرىلماعان. ناتيجەسىندە ەنەرگەتيكا مينيسترلىگى ەلەكتروندىق ساۋدا بويىنشا جەدەل ارەكەت ەتىپ، ونى اۋىزدىقتاي الماعان، – دەدى پرەزيدەنت.

سونىمەن قاتار قاسىم-جومارت توقايەۆ اتالعان سالانى رەفورمالاۋعا قاتىستى جۇيەلى ءادىستىڭ جوق ەكەنىن اتاپ ءوتتى.

– ەشكىم ءوزىن ۇنەمى شىعىنعا ۇشىراتا بەرمەيتىنىن ءتۇسىنۋ ماڭىزدى. ەلىمىز گاز جانە گاز وڭدەۋ سالالارىندا ينۆەستيسياسىز، ءتىپتى گازسىز قالۋى دا مۇمكىن. سوندىقتان جۇيەلى، ءبىراق ويلاستىرىلعان جانە كەزەڭ-كەزەڭىمەن جۇزەگە اسىرىلاتىن رەفورمالاردان باسقا جول جوق. الداعى ۋاقىتتا گاز سالاسىن ساپالى تۇردە قايتا قاراپ، ىشكى نارىقتى تاۋارلىق گازبەن تولىققاندى قامتاماسىز ەتۋ كەرەك، – دەدى مەملەكەت باسشىسى.

وسىعان بايلانىستى پرەزيدەنت قازىرگى جاعدايدى تۇراقتاندىرۋعا باعىتتالعان ەڭ الدىمەن اتقارىلاتىن شارالار تۋرالى باياندادى.

– بىرىنشىدەن، مەن ماڭعىستاۋ بويىنشا ۇكىمەتتىك كوميسسيانىڭ ۇسىنعان شارالار كەشەنىن ماقۇلدايمىن. ەكىنشىدەن، مونوپولياعا قارسى ورگانعا كاسىپكەرلىك كودەكستىڭ 119-بابىنا سايكەس سۇيىتىلعان گازدىڭ باعالارىن 180 كۇنگە ۋاقىتشا باعالىق رەتتەۋدى ەنگىزۋدى تاپسىرامىن. وبلىستاردا حالىق ءۇشىن شەكتى باعالار وتكەن جىلدىڭ سوڭىنداعى باعا دەڭگەيىنەن اسپاۋعا ءتيىس. ۇشىنشىدەن، ۇكىمەتكە سۇيىتىلعان گازدى ەلەكتروندىق ساۋدا الاڭدارى مەن بيرجالار ارقىلى وتكىزۋگە تولىق كوشۋدى ءبىر جىلعا شەگەرۋدى تاپسىرامىن. وسى كەزەڭدە نورماتيۆتىك-قۇقىقتىق بازانى مۇقيات ازىرلەپ، ساۋدا الاڭدارى جۇمىسىنىڭ اشىق بولۋىن قامتاماسىز ەتۋ، باعانىڭ كۇرت ءوسۋىن شەكتەۋ تەتىكتەرىن ەنگىزۋ قاجەت. تورتىنشىدەن، باس پروكۋراتۋراعا باسەكەلەستىكتى قورعاۋ اگەنتتىگىمەن بىرلەسىپ، باعالىق ءسوز بايلاسۋ مەن وزگە دە باسەكەلەستىككە قارسى ىس-ارەكەتتەرگە قاتىستى تەرگەۋ جۇرگىزۋدى تاپسىرامىن. تەرگەۋدى جەدەل جۇرگىزىڭىز. جيىرما كۇن ىشىندە ەسەپ بەرىڭىز، – دەدى قاسىم-جومارت توقايەۆ.

جيىن سوڭىندا قاسىم-جومارت توقايەۆ الەۋمەتتىك-ەكونوميكالىق احۋالدى تۇراقتاندىرۋ ءۇشىن ءبىرقاتار قوسىمشا تاپسىرما بەردى:

1. مۇناي ونىمدەرىنىڭ (بەنزين، ديزەل، سۇيىتىلعان گاز) باعاسىنا مەملەكەتتىك رەتتەۋدى 180 كۇنگە  ەنگىزۋ؛

2. الەۋمەتتىك ماڭىزى بار ازىق-تۇلىك تاۋارلارىنىڭ باعاسى بويىنشا مەملەكەتتىك رەتتەۋدى ەنگىزۋ. شەشىمدى ناقتى ايماقتاعى الەۋمەتتىك-ەكونوميكالىق جاعدايعا قاراي وڭىرلەردىڭ اكىمدەرى قابىلدايدى؛

3. «جەكە تۇلعالاردىڭ بانكروتتىعى تۋرالى» زاڭدى ازىرلەۋگە كىرىسۋ؛

4. حالىق ءۇشىن 180 كۇنگە كوممۋنالدىق تاريفتەردى كوتەرۋگە موراتوريي ەنگىزۋ قاجەتتىگىن قاراستىرۋ؛

5. حالىقتىڭ الەۋمەتتىك جاعدايى ناشار توپتارى ءۇشىن نارىقتاعى باسپانانى جالعا الۋ قۇنىن سۋبسيديالاۋ ماسەلەسىن قاراستىرۋ؛

7. دەنساۋلىق ساقتاۋ جانە بالالار ماسەلەلەرىن شەشۋ ءۇشىن «قازاقستان حالقىنا» دەپ اتالاتىن قوعامدىق قور قۇرۋ، ونى مەملەكەتتىك جانە جەكە كوزدەر ارقىلى قارجىلاندىرۋ.