اقوردا سايتى ماعزۇم مىرزاعالييەۆ پرەزيدەنت كەڭەسشىسى لاۋازىمىنا تاعايىندالعانىن ءمالىم ەتتى.
ماعزۇم مىرزاعالييەۆ بۇعان دەيىن كەي مۇشەلەرى وتستاۆكاعا كەتكەن اسقار مامين ۇكىمەتىنىڭ قۇرامىندا بولىپ، ەنەرگەتيكا مينيسترلىگىن باسقارعان.
قاڭتاردىڭ باسىندا جاڭاوزەندە باستالعان حالىق نارازىلىعى ءدال وسى مىرزاعالييەۆ جاۋاپتى بولعان اۆتوكولىك گازىنىڭ قىمباتتاۋىنان باستالعان. سول كەزدە ەكس-مينيستر گاز باعاسىن نارىق رەتتەپ وتىرعانىن، ونى ارزانداتۋ مۇمكىن ەمەستىگىن ايتقان.
ال ونىڭ كومەكشىسى ءتىپتى "حالىق گاز قىمبات بولسا، قوعامدىق كولىكپەن ءجۇرسىن" دەپ جۇرتتىڭ اشۋىنا تيگەن.
ارتىنشا، جاڭاوزەن تۇرعىندارىن رەسپۋبليكانىڭ وزگە دە ايماقتارى قولداي باستاعاندا ۇكىمەت گاز باعاسىن 120 تەڭگەدەن 50 تەڭگەگە دەيىن تومەندەتكەن. بۇگىندە ەل بويىنشا اۆتوكولىك گازىنىڭ ءليترى 50-75 تەڭگە ارالىعىندا ساتىلىپ جاتىر.
سونداي-اق باعانى بىردەن 120 تەڭگەگە نەگىزسىز قىمباتتاتقان وپەراتورلارعا قاتىستى تەرگەۋ ءجۇرىپ جاتىر.
پىكىر قالدىرۋ