تيمۋر قۇلىبايەۆ "اتامەكەن" ۇلتتىق كاسىپكەرلەر پالاتاسى ءتوراعاسى قىزمەتىنەن كەتتى. بۇل تۋرالى اقپارات كاسىپكەرلەر پالاتاسىنىڭ رەسمي سايتىندا جاريالاندى.
"سەزد دەلەگاتتارى مەن ءتورالقا مۇشەلەرىنە ماعان سەنىم بىلدىرگەنى ءۇشىن العىس ايتامىن. ۇلتتىق كاسىپكەرلەر پالاتاسىنىڭ جوعارى باقىلاۋ ورگانىن سەگىز جىل بويى باسقارۋ مەن ءۇشىن ۇلكەن قۇرمەت پەن جاۋاپكەرشىلىك بولدى" دەلىنگەن قۇلىبايەۆ مالىمدەمەسىندە.
تيمۋر قۇلىبايەۆ قازاقستاننىڭ ەكس-پرەزيدەنتى نۇرسۇلتان نازاربايەۆتىڭ ورتانشى كۇيەۋ بالاسى. ايەلى دينارا قۇلىبايەۆا ەكەۋىنىڭ ورتاق كاپيتالىن قوسقاندا قازاقستانداعى ەڭ باي ادام بولىپ شىعادى.
قاۋىپسىزدىك كەڭەسىنىڭ ءتورالىعى ن.نازاربايەۆتان ق.توقايەۆقا وتكەلى نازاربايەۆتىڭ وسىمەن ءۇشىنشى كۇيەۋبالاسى قىزمەتىنەن كەتتى.
بۇعان دەيىن "قازترانسويل" اق باسقارما ءتوراعاسى ديماش دوسانوۆ پەن "قازترانسگاز "ۇك "اق باسقارما ءتوراعاسى قايرات شارىپبايەۆ قىزمەتىنەن بوساتىلعان.
ديماش دوسانوۆ نۇرسۇلتان نازاربايەۆتىڭ كىشى قىزى ءاليا نازاربايەۆانىڭ، ال قايرات شارىپبايەۆ ۇلكەن قىزى داريعا نازاربايەۆانىڭ كۇيەۋى.
پىكىر قالدىرۋ