بەلسەندى، دەموكراتيالىق پارتيا باستاماشىل توبىنىڭ جەتەكشىسى جانبولات ماماي قىلمىستىق كودەكستىڭ 274-بابى (كورىنەۋ جالعان اقپارات تاراتۋ) بويىنشا جاۋاپ الۋعا شاقىرىلدى. بۇل تۋرالى ونىڭ جۇبايى، جۋرناليست ينگا يمانباي ءمالىم ەتتى.
ءجۋرناليستىڭ سوزىنشە، بەلسەندى 20 قاڭتارعا الماتىداعى پوليسيا دەپارتامەنتىنە شاقىرىلعان.
ينگا يمانباي بىرنەشە كۇن بۇرىن پوليسيا دەپارتامەنتىنىڭ ۋاقىتشا ۇستاۋ يزولياتورىندا سوققىعا جىعىلعان "دەموكراتيالىق پارتيا" بەلسەندىسى داۋرەن دوستياروۆ بوساتىلعانىن ەسكە الىپ، جانبولاتتى نە كۇتىپ تۇرعانى بەلگىسىز ەكەنىن ايتتى. ول تىركەلمەگەن دەموكراتيالىق پارتيا كوشباسشىسىن جابۋ ارقىلى، بيلىك ەلدەگى وپپوزيسيا وكىلىن جازالاۋعا شەشىم قابىلداعان بولۋى مۇمكىن ەكەنىن جەتكىزگەن.
سونداي-اق ول جانبولات ماماي ەشكىمنەن جاسىرىنىپ جۇرمەگەنىن، جاقىندا العان جاراقاتىنان ايىققان سوڭ تەرگەۋ امالدارى ءۇشىن پوليسياعا مىندەتتى تۇردە باراتىنىن ايتتى.
بۇعان دەيىن الماتىداعى حالىق نارازىلىعىنان كەيىنگى جاپپاي تارتىپسىزدىك كەزىندە بەلسەندىنى الدەكىمدەر ساباپ كەتكەنى حابارلانعان.
ارتىنشا، جانبولات ماماي ەلدە بولعان جاعداي تۋرالى الەمنىڭ كوپتەگەن جەتەكشى باسىلىمدارىنا سۇحبات بەرگەن.
پىكىر قالدىرۋ