پرەزيدەنت قاسىم-جومارت توقايەۆ قورعانىس ءمينيسترىنىڭ ورىنباسارىن قىزمەتىنەن بوساتتى. بۇل تۋرالى اقوردا سايتى حابارلادى.
"مەملەكەت باسشىسىنىڭ وكىمىمەن دارىن شىلبىن ۇلى تۇياقوۆ قازاقستان رەسپۋبليكاسى قورعانىس ءمينيسترىنىڭ ورىنباسارى لاۋازىمىنان بوساتىلدى" دەلىنگەن حابارلامادا.
كەشە پرەزيدەنت ۇكىمىمەن مۇرات بەكتانوۆ قورعانىس ءمينيسترى لاۋازىمىنان بوساتىلىپ، بۇل قىزمەتكە رۋسلان جاقسىلىقوۆ تاعايىندالعان بولاتىن.
سونىمەن قاتار كەشە قاسىم-جومارت توقايەۆ قورعانىس مينيسترلىگىنىڭ باسشىلىق قۇرامىمەن كەڭەس وتكىزىپ، مۇرات بەكتانوۆتىڭ قىزمەتىنەن كەتۋىنە قاتىستى پىكىر بىلدىرگەن.
– قاڭتار وقيعاسى كەزىندە قارۋلى كۇشتەر وزىنە سەنىمسىز ءارى قابىلەتسىز باسشىلىعىنىڭ كەسىرىنەن جۇكتەلگەن مىندەتتەردى ءتيىستى دەڭگەيدە اتقارا المادى. مينيستر بەكتانوۆ كومانديرلىك قابىلەتىن كورسەتە المادى. كوماندالىق-شتابتىق جانە اسكەري جاتتىعۋلار كەزىندە وڭ ناتيجە كورسەتكەن ارميامىز بولا تۇرا، سىن ساعاتتا ونىڭ الەۋەتىن پايدالانا المادىق. سىرتتان كومەك شاقىرۋعا ءماجبۇر بولدىق، – دەدى توقايەۆ.
پىكىر قالدىرۋ