بعم مەكتەپكە دەيىنگى جانە ورتا ءبىلىم كوميتەتى ءتوراعاسىنىڭ ورىنباسارى ساپۋرا تولەكوۆا 24 قاڭتاردان كەيىنگى وقۋ فورماتىنا قاتىستى وزگەرىستەر تۋرالى ايتتى.

– بىرىنشىدەن بالاباقشالار، مەكتەپكە دەيىنگى مەكەمەلەر شتاتتىق رەجيمدە، اتا-انانىڭ ءوتىنىشى نەگىزىندە ءوز جۇمىسىن قالىپتى جالعاستىرا بەرەدى. ەگەر مەكتەپتەگى وقۋشىلاردىڭ جالپى سانى 600-گە دەيىن بولسا شتاتتىق رەجيمدە جۇمىس ىستەيدى. ال، مەكتەپتىڭ كونتينگەنتى 600-دەن ارتىق بولسا 1 اۋىسىمدا مەكتەپتىڭ جوبالىق قۋاتىنىڭ 50 پايىزىن قامتيتىن تولىمدىلىقپەن شتاتتىق فورماتتا وقي الادى. بۇل جەردە باسىمدىق باستاۋىش سىنىپتارعا بەرىلەدى (1-4سىنىپتار). ويتكەنى باستاۋىش سىنىپ وقۋشىلارىنا ونلاين فورماتتاعى پلاتفورمالاردى قولدانۋ قيىندىق تۋعىزادى. ال، حالىقارالىق مەكتەپتەردە 1-6 سىنىپتارعا شتاتتىق رەجيمدە وقۋعا باسىمدىق بەرىلەدى. باسقا سىنىپتار تولىمدىلىعىنا وراي وقۋدى جالعاستىرادى، – دەدى ساپۋرا تولەكوۆا. 

5-11 سىنىپ وقۋشىلارىنا قاتىستى مەكتەپ اكىمشىلىكتەرىنە اتا-انالاردىڭ بالالاردى شتاتتىق فورماتتا وقىتۋعا، اۋىسىمدار مەن كىشى اۋىسىمداردىڭ جۇمىسىن ۇيىمداستىرۋعا، كەيبىر پاندەر بويىنشا وقىتۋدى قاشىقتان وقىتۋ فورماتىنا اۋىستىرۋعا دەگەن ىنتاسىن ەسكەرۋ ۇسىنىلادى.