"سامۇرىق-قازىنا" ۇلتتىق ءال-اۋقات قورىنىڭ باسقارما ءتوراعاسى الماسادام ساتقالييەۆ پرەزيدەنت قاسىم-جومارت توقايەۆتىڭ سىنىنان كەيىن قوردى رەفورمالاۋعا دايىن ەكەنىن مالىمدەدى. بۇل تۋرالى ول facebook پاراقشاسىندا جازدى.

– "سامۇرىق-قازىنانىڭ" الدىندا ۇلكەن مۇمكىندىك تۋىپ وتىر. قوعامدا قىزۋ تالقىلانىپ جاتقان رەفورمالاردى جۇزەگە اسىرۋىمىز كەرەك. رەفورمالاۋ باعدارلاماسىنا ناقتى، ءارى ءتيىمدى ۇسىنىستار بەرە الاتىن ازاماتتارمەن ديالوگ ورناتۋعا دايىنبىز، – دەدى ا. ساتقالييەۆ.

ول الداعى ۋاقىتتا جوسپارلار اشىق اقپارات كوزدەرىندە جانە كورپوراتيۆتىك سايتتا جاريالاناتىنىن ايتتى.

– ءبىز بارلىق ساۋالدارعا جاۋاپ بەرەمىز. وزگەرىستى وزىمىزدەن باستاپ، اشىقتىق، ەسەپ بەرۋ، بيزنەسكە كەدەرگى كەلتىرمەۋ، الەۋمەتتىك جاۋاپكەرشىلىك جانە سىبايلاس جەمقورلىقپەن كۇرەس قاعيداتتارىن نەگىزگە الىپ وتىرمىز. "سامۇرىق-قازىنا" قازاقستان رەسپۋبليكاسى ازاماتتارىنا قور اكتيۆتەرىن تىكەلەي يەلەنۋگە مۇمكىندىك بەرمەك. ءبىز بيزنەس-پروسەستەر مەن قوردىڭ كومپانيالار توبىنداعى كورپوراتيۆتىك باسقارۋ تاجىريبەسىن رەفورمالاۋدى ۇسىنامىز. ەسەپ بەرۋ مەن باسقارۋ تەتىكتەرى باسقاشا بولادى. مۇناي، گاز، كومىر، تاسىمالداۋ مەن ۇقساتۋ، ەلەكترقۋاتىن ءوندىرۋ، تەلەكوممۋنيكاسيالار جانە باسقا دا سالالارداعى قاتىناستاردى جاڭالاۋعا بەت الامىز، –  دەدى ءۇاق باسقارما ءتوراعاسى.

21 قاڭتاردا پرەزيدەنت قاسىم-جومارت توقايەۆ قازاقستاننىڭ ءىرى بيزنەسمەندەرىمەن كەزدەسۋىندە "سامۇرىق-قازىنا" قورى جۇمىسىن اشىق جۇرگىزبەيتىنىن، ساتىپ الۋلار جۇيەسى ءتيىمسىز ەكەنىن ايتقان. مەملەكەت باسشىسى ءوز سوزىندە اۋقىمدى جوبالار اياعىنا دەيىن جەتكىزىلمەي جاتقانىن اتاپ ءوتىپ، قورعا تۇبەگەيلى رەفورما جاساۋدى تاپسىرعان. اتالعان ماسەلە بويىنشا پرەزيدەنت الماسادام ساتقالييەۆپەن سويلەسكەنىن، ەگەر ول جۇكتەلگەن مىندەتتى اتقارا الماسا، ءوزى دە، قور دا بىرگە كەتەتىنىن مالىمدەگەن.