قازاقستان ۇلتتىق بانكىنىڭ جاڭا ءتوراعاسى قىزمەتىنە ەكى ۇمىتكەر قاراستىرىلۋدا. ءقازىر قارجى نارىعىن رەتتەۋ جانە دامىتۋ اگەنتتىگىنىڭ باسشىسى ءمادينا ءابىلقاسىموۆا مەن ۇلتتىق بانك ءتوراعاسىنىڭ ورىنباسارى اقىلجان بايماعامبەتوۆتىڭ كانديداتۋراسى قارالىپ جاتىر. بۇل تۋرالى كازتاگ cايتى مالىمدەدى.
اقپاراتتا ۇلتتىق بانك قىزمەتكەرلەرى ءوزىن جاقسى جاعىنان كورسەتە بىلگەن بايماعامبەتوۆكە كوبىرەك باسىمدىق بەرىپ وتىرعانى ايتىلادى.
ءمادينا ءابىلقاسىموۆا 2019 جىلدىڭ جەلتوقسان ايىنان بەرى قارجى نارىعىن رەتتەۋ جانە دامىتۋ اگەنتتىگىنىڭ باسشىسى قىزمەتىن اتقارىپ كەلەدى. وعان دەيىن ول ۇلتتىق بانك ءتوراعاسىنىڭ ورىنباسارى، ۇلتتىق ەكونوميكا ۆيسە-مينيسترى لاۋازىمىندا بولعان. الايدا اتالعان قىزمەتتە 25 كۇن جۇمىس ىستەگەن. ونىڭ الدىندا ەڭبەك جانە حالىقتى الەۋمەتتىك قورعاۋ ءمينيسترى قىزمەتىن اتقارعان.
اقىلجان بايماعامبەتوۆ 2019 جىلدىڭ جەلتوقسانىنان ۇلتتىق بانك ءتوراعاسىنىڭ ورىنباسارى. وعان دەيىن ۇلتتىق بانك ۇلتتىق ينۆەستيسيالىق كورپوراسياسىنىڭ باسقارما ءتوراعاسى، ديرەكتورلار كەڭەسىنىڭ مۇشەسى بولدى. سونىمەن قاتار ول بىرنەشە جىلدار بويى قازاقستان قور بيرجاسى (KASE) ديرەكتورلار كەڭەسىنىڭ مۇشەسى بولعان.
ايتا كەتەيىك، ۇلتتىق بانك ءتوراعاسى قىزمەتىن اتقارعان ەربولات دوسايەۆ بۇگىن الماتى قالاسىنىڭ اكىمى قىزمەتىنە تاعايىندالعانى حابارلاندى.
پىكىر قالدىرۋ