قازگيدرومەت اقپان ايىنا ارنالعان اۋا رايى بولجامىن جاريالادى.
اقپاندا ەلدىڭ باسىم بولىگىندە اۋانىڭ ورتاشا تەمپەراتۋراسى كليماتتىق نورمادان 1-2° جوعارى بولادى دەپ كۇتىلۋدە، بۇل يران مەن ورتا ازيا اۋداندارىنان جىلى اۋا ماسسالارىنىڭ شىعارىلۋىنا بايلانىستى بولادى.
شىعىستا تايمىر مەن شىعىس ءسىبىر اۋداندارىنان سۋىق انتيسيكلوننىڭ ىقپال ەتۋىنە بايلانىستى اۋا تەمپەراتۋراسى كليماتتىق نورما شاماسىندا بولادى.
اقپان ايىندا جاۋىن-شاشىن مولشەرى رەسپۋبليكانىڭ باسىم بولىگىندە نورما شاماسىندا، ال قازاقستاننىڭ باتىسىندا، وڭتۇستىك، وڭتۇستىك-شىعىس جانە شىعىس اۋماقتاردىڭ تاۋلى جانە تاۋ بوكتەرلى وڭىرلەرىندە نورمادان كوپ، ماڭعىستاۋ مەن قىزىلوردا وبلىستارىندا جانە اقتوبە وبلىسىنىڭ قيىر وڭتۇستىگىندە نورمادان از بولجانادى.
"ءبىرىنشى ونكۇندىكتىڭ باسىندا ءسىبىر انتيسيكلونىنان قازاقستاننىڭ باسىم بولىگىندە ايازدى جانە كوبىنەسە از جاۋىن-شاشىندى اۋا رايى بولادى، ال رەسپۋبليكانىڭ باتىسىندا باتىس جانە وڭتۇستىك سيكلونداردىڭ ىقپالىمەن جاۋىن-شاشىن (جاڭبىر، قار)، جەلدىڭ 15-20 م/س دەيىن كۇشەيۋى، تۇمان جانە كوكتايعاق قۇبىلىستارى كۇتىلەدى. سيكلوننىڭ سولتۇستىك-شىعىس باعىتتا اۋىسۋىمەن رەسپۋبليكانىڭ قالعان اۋماعىندا دا جاۋىن-شاشىندى جانە جەلدى اۋا رايى كۇتىلەدى.
اقپاننىڭ ءبىرىنشى ونكۇندىگىنىڭ ءبىرىنشى جارتىسىندا وڭتۇستىك مەن باتىستا كۇندىزگى اۋا تەمپەراتۋراسىنىڭ جوعارىلاۋى كۇتىلەدى.
ءبىرىنشى ونكۇندىكتىڭ ورتاسىندا ەلدىڭ سولتۇستىگىندە جانە ورتالىعىندا تۇندە -10-20°س-تان -5-13°س-قا دەيىن، كۇندىز -5-15°س-تان 0،-8°س-قا دەيىن ايازدىڭ السىرەۋى بولجانادى.
ونكۇندىكتىڭ سوڭىندا رەسپۋبليكانىڭ شىعىسىندا تەمپەراتۋرا فونى تۇندە -18-23°س-تان -12-17°س-قا دەيىن، سولتۇستىك-شىعىستا -28-33°س-تان -20°س-قا دەيىن، كۇندىز -10-15°س-تان -5-10°س-قا دەيىن جوعارىلايدى.
ەكىنشى جانە ءۇشىنشى ونكۇندىكتەردە اۋىسپالى باريكالىق تۇزىلىمدەرى اسەر ەتۋىنە بايلانىستى اۋا رايىنىڭ تۇراقسىز سيپاتى كۇتىلەدى: جاۋىن-شاشىن (جاڭبىر، قار)، ەكپىندى جەل، ەلدىڭ سولتۇستىك-باتىس جارتىسى مەن باتىسىندا بۇرقاسىن، وڭتۇستىگىندە جەكەلەگەن كۇندەرى شاڭدى داۋىل كۇتىلەدى.
شىعىس ءسىبىر اۋداندارىنان سۋىق انتيسيكلوننىڭ اسەرىنەن جەكەلەگەن كۇندەرى تەمپەراتۋرالىق فون تومەندەيدى دەپ كۇتىلەدى:
- باتىستا جانە سولتۇستىك-باتىستا تۇندە -12-22°س-قا دەيىن، كۇندىز -3-10°س-قا دەيىن؛
- ەءلىمىزدىڭ سولتۇستىك جارتىسىندا تۇندە -20-35°س-قا دەيىن، كۇندىز -13-18°س-قا دەيىن؛
- وڭتۇستىك جارتىسىندا تۇندە -8-15°س-قا دەيىن، كۇندىز -5+3°س-قا دەيىن.
يران مەن ورتا ازيا اۋداندارىنان جىلى اۋا ماسسالارىنىڭ شىعارىلۋىنا بايلانىستى اقپاننىڭ ەكىنشى جانە ءۇشىنشى ونكۇندىكتەردىڭ كەي كۇندەرى تەمپەراتۋرالىق فون جوعارىلايدى دەپ بولجانادى:
- باتىستا تۇندە -5+1°س-قا دەيىن، كۇندىز +2+8°س-قا دەيىن؛
- سولتۇستىك-باتىستا، سولتۇستىكتە، ورتالىقتا جانە شىعىستا تۇندە -3-10°س-قا دەيىن، كۇندىز -6+3°س-قا دەيىن؛
- وڭتۇستىكتە، وڭتۇستىك-شىعىستا جانە وڭتۇستىك-باتىستا تۇندە -5+5°س دەيىن، كۇندىز +5+12°س دەيىن.
پىكىر قالدىرۋ