ءماجىلىس ەكس-پرەزيدەنت نۇرسۇلتان نازاربايەۆتى ەلدەگى ساياساتتى جۇرگىزۋگە ارالاسۋىن شەكتەيتىن نورمالاردى ماقۇلدادى.
ءماجىلىستىڭ بۇگىنگى وتىرىسىندا "قازاقستان رەسپۋبليكاسىنىڭ كەيبىر كونستيتۋسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى" كونستيتۋسيالىق زاڭىنا سەنات ەنگىزگەن جوبالار ماقۇلداندى.
ەنگىزىلگەن وزگەرىسكە ساي، مەملەكەتتىك باستامالاردى نازاربايەۆپەن اقىلداسۋدى الىپ تاستاۋ زاڭنامالىق تۇرعىدان رەتتەلدى.
وزگەرىس قۇجاتقا پرەزيدەنت قول قويعان كۇننەن باستاپ كۇشىنە ەنەدى.
سونداي-اق ءماجىلىس "قازاقستان حالقى اسسامبلەياسى تۋرالى"، "ءقاۋىپسىزدى كەڭەسى تۋرالى" زاڭدارعا وزگەرىستەر مەن تولىقتىرۋلار ەنگىزگەن. وزگەرىسكە ساي، ءماجىلىس قازاقستاننىڭ ەكس-پرەزيدەنتى نۇرسۇلتان نازاربايەۆقا قحا مەن قاۋىپسىزدىك كەڭەسىن ءومىر بويىنا باسقارۋعا قۇقىق بەرەتىن نورمالاردى الىپ تاستادى.
قازىرگى ۋاقىتتا نۇرسۇلتان نازاربايەۆتا بيلىككە ىقپال ەتە الاتىنداي ەشقانداي زاڭدىق تەتىك قالعان جوق. تەك ونىڭ جانە وتباسى مۇشەلەرىنىڭ قاۋىپسىزدىگىن قامتاماسىز ەتەتىن، قابىلداعان شەشىمدەرى ءۇشىن جاۋاپكەرشىلىكتەن بوساتاتىن "قازاقستان رەسپۋبليكاسىنىڭ تۇڭعىش پرەزيدەنتى - ەلباسى تۋرالى" زاڭ وزگەرىسسىز تۇر.
زاڭعا سايكەس قازاقستاننىڭ بۇرىنعى پرەزيدەنتى نۇرسۇلتان نازاربايەۆقا ايرىقشا قۇزىرەتتەر مەن كەپىلدىكتەر بەرىلگەن.
ماسەلەن، زاڭعا سايكەس ن.نازاربايەۆ ايرىقشا ەرەكشەلىك بەلگىسى - التىن جۇلدىز جانە "وتان" وردەنىنە، "حالىق قاھارمانى" (نارودنىي گەروي) اتاعىنا يە.
♦ قازاقستان رەسپۋبليكاسى تۇڭعىش پرەزيدەنتىنىڭ – ەلباسىنىڭ زاڭدى قىزمەتىنە كەدەرگى جاساۋعا، قازاقستان رەسپۋبليكاسى تۇڭعىش پرەزيدەنتىن - ەلباسىن كوپشىلىك الدىندا قورلاۋعا نەمەسە ونىڭ ابىرويى مەن قادىر-قاسيەتىنە وزگەدەي قول سۇعۋعا، سونداي-اق قازاقستان رەسپۋبليكاسى تۇڭعىش پرەزيدەنتىنىڭ – ەلباسىنىڭ بەينەسىن بۇلدىرۋگە جول بەرىلمەيدى جانە ونداي ارەكەتتەر زاڭمەن قۋدالانادى.
♦ قازاقستان رەسپۋبليكاسىنىڭ تۇڭعىش پرەزيدەنتىنە – ەلباسىنا ەشكىمنىڭ تيىسۋىنە بولمايدى. ول ءوزى قازاقستان رەسپۋبليكاسى پرەزيدەنتىنىڭ وكىلەتتىكتەرىن ورىنداۋ كەزەڭىندە جاساعان، ال بۇلار توقتاتىلعاننان كەيىن قازاقستان رەسپۋبليكاسىنىڭ تۇڭعىش پرەزيدەنتى – ەلباسى دەگەن ءوز مارتەبەسىن جۇزەگە اسىرۋعا بايلانىستى ارەكەتتەرى ءۇشىن جاۋاپتىلىققا تارتىلمايدى. ونى ۇستاپ الۋعا، قاماققا الۋعا جانە كۇزەتپەن ۇستاۋعا، تىنتۋگە، ودان جاۋاپ الۋعا نە جەكە باسىن جەتە تەكسەرۋگە بولمايدى.
تيىسپەۋشىلىك قازاقستان رەسپۋبليكاسىنىڭ تۇڭعىش پرەزيدەنتىنە – ەلباسىنا جانە ونىمەن بىرگە تۇراتىن وتباسى مۇشەلەرىنە جەكە مەنشىك قۇقىعىمەن تيەسىلى بارلىق مۇلىككە، سونداي-اق ولار پايدالاناتىن تۇرعىن جانە قىزمەتتىك ءۇي-جايلارعا، قىزمەتتىك كولىككە، بايلانىس قۇرالدارىنا، جازىسقان حاتتارىنا، ولارعا تيەسىلى قۇجاتتارعا قولدانىلادى. تيىسپەۋشىلىك قازاقستان رەسپۋبليكاسى تۇڭعىش پرەزيدەنتىنىڭ – ەلباسىنىڭ قورىنا جانە ول قۇراتىن وزگە دە زاڭدى تۇلعالارعا تيەسىلى مۇلىككە دە قولدانىلادى.
♦ قازاقستان رەسپۋبليكاسىنىڭ تۇڭعىش پرەزيدەنتىنە – ەلباسىنا جانە ونىمەن بىرگە تۇراتىن وتباسى مۇشەلەرىنە جەكە مەنشىك قۇقىعىمەن تيەسىلى مۇلىككە، سونداي-اق ول قۇراتىن زاڭدى تۇلعالاردىڭ مۇلكىنە قانداي دا ءبىر شەكتەۋلەر قويىلمايدى.
قازاقستان رەسپۋبليكاسى تۇڭعىش پرەزيدەنتىنىڭ – ەلباسىنىڭ جانە ونىمەن بىرگە تۇراتىن وتباسى مۇشەلەرىنىڭ بانكتىك شوتتارىنىڭ بانكتىك قۇپيالىعىنا جانە ولارعا تيىسپەۋشىلىككە كەپىلدىك بەرىلەدى.
پىكىر قالدىرۋ