ءماجىلىس وتىرىسىندا "اق جول" فراكسياسىنىڭ اتىنان دەپۋتات ماقسات رامانقۇلوۆ دە-وفشوريزاسيا ماسەلەسىن كوتەرىپ قارجى مونيتورينگ اگەنتتىگىنىڭ ءتوراعاسى جاننات ەليمانوۆقا دەپۋتاتتىق ساۋال جولدادى.

دەپۋتات "Tax Justice network" حالىقارالىق ۇيىمىنىڭ مالىمەتى بويىنشا، سوڭعى 25 جىلدا قازاقستاننان شەتەلدىك وففشورلارعا شامامەن 140-160 ميلليارد اقش دوللارى شىعارىلعان، بۇل بۇكىل ەلدىڭ جىلدىق ىشكى جالپى ءونىمى مەن ونىڭ سىرتقى قارىزىنا تەڭ ەكەنىن ايتادى.

– كەيبىر مالىمەتتەرگە سايكەس، سوڭعى بەس جىلدا قازاقستان رەسپۋبليكاسىنىڭ قۇقىق قورعاۋ ورگاندارى قاراجاتتى شەتەلگە زاڭسىز شىعارۋ فاكتىلەرى بويىنشا ەكى جۇزدەن استام ءىس قوزعاعان.  الايدا، ناقتى ناتيجەلەرى تۋرالى ەشتەڭە بەلگىسىز. سونىمەن قاتار، قاڭتار قاسىرەتىندە كەيبىر وليگارحتار قازاقستاننان جەكە ۇشاقتارمەن كەتىپ قانا قويماي، قىرۋار قارجىنى شەتەلدەگى ەسەپشوتتارعا اۋدارعان تۋرالى رەسمي ەمەس اقپارات بار، – دەيدى ول.

ماقسات رامانقۇلوۆ "اق جول"  فراكسياسى قارجى مونيتورينگى اگەنتتىگىنەن تومەندەگىدەي ماسەلەلەر بويىنشا مالىمەت بەرۋدى سۇراپ، ناقتى قادامدار جاساۋعا شاقىردى:

1) اگەنتتىك قۇرىلعاننان بەرى قازاقستان ەكونوميكاسىنا وففشورلىق ايماقتاردان ناقتى قانشا قاراجات قايتارىلعان تۋرالى اقپارات بەرۋ.

2) قاڭتارداعى قايعىلى وقيعالار كەزىندە قازاقستاننان شەتەلگە كانداي ءىرى قاراجات شاعارىلدى (ميلليون اقش دوللاردان كوپ سۋممالار)، ونى كىمدەر شىعاردى، كىمدەردىن شوتتارىنا ءتۇستى.

سول كۇردەلى كۇندەردە كولەڭكەلى كاپيتالدار شىعارىلدى، دەگەن كۇمانىمىز بار. ول ادامدار تاعدىرىن ەلىمىزبەن بايلانىستىرماسا، قالاعان جەردە قالا بەرسىن. ءبىراق شىعارىلعان قاراجات حالىقتان ۇرلانعان بولسا، ەلىمىزگە قايتارىلىپ، ەكونوميكاعا جۇمىس ىستەسىن.

3) سوندىقتان بۇنداي فاكتىلەر بولعان جاعدايدا، سالىق ورگاندارىنان مۇنداي قارجىنىن شىعۋىنىڭ زاڭدىلىعىن جانە ولاردىڭ ءتيىستى سالىقتاردى تولەگەنىن تەكسەرۋىن سۇرايمىز.