رەسەي مەن جۇڭگو ناتو-نىڭ ودان ءارى كەڭەيۋىنە قارسى تۇرۋ ءۇشىن تىزە قوستى.
بەيجىڭدەگى قىسقى وليمپيادا ويىندارى كەزىندە جۇڭگو مەن رەسەيدىڭ كوپتەگەن ماسەلەلەر بويىنشا كەلىسىمدەرىن كورسەتەتىن مالىمدەمە جاريالاندى.
پۋتين "باتىس دەرجاۆالارى رەسەيدى كۇيرەتۋ ءۇشىن ناتو وداعىن پايدالانىپ جاتىر" دەپ مالىمدەدى.
رەسەي ۋكراينامەن شەكارادا 100 مىڭعا جۋىق ساربازىن ورنالاستىرعان. ورىستار مەن ۋكراينداردى "ءبىر ۇلت" دەگەن پۋتين ۋكراينانىڭ ناتو-عا كىرۋىنە تىيىم سالۋدى تالاپ ەتتى.
كرەمل "وتە جاقسى" دەپ مالىمدەگەن كەلىسسوزدەر ويىنداردىڭ اشىلۋ سالتاناتى قارساڭىندا ءوتتى. بۇل كوشباسشىلاردىڭ پاندەميا باستالعالى بەرى ءبىرىنشى رەت بەتپە-بەت كەزدەسۋى.
"[رەسەي مەن جۇڭگو] اراسىنداعى دوستىقتىڭ شەگى جوق" دەلىنگەن حابارلامادا.
ەكى ەل اقش، ۇلىبريتانيا جانە اۆستراليا اراسىنداعى اۋكۋس قاۋىپسىزدىك پاكتىسىنە "قاتتى الاڭداۋشىلىق" ءبىلدىردى.
ماسكەۋ سونىمەن قاتار بەيجىڭنىڭ "ءبىر جۇڭگو" ساياساتىن قولدايتىنىن مالىمدەدى.
دەگەنمەن، تايۆان ءوزىن كونستيتۋسياسى جانە دەموكراتيالىق جولمەن سايلانعان كوشباسشىلارى بار تاۋەلسىز ەل رەتىندە سانايدى.
اقش سارسەنبىدە "رەسەي ۋكرايناعا شابۋىل جاساۋ ءۇشىن ۋكرايندەردىڭ جالعان شابۋىلىن جوسپارلاپ وتىر" دەپ ايىپتادى.
رەسەي شابۋىل جاساۋدى جوسپارلاپ وتىرعانىن جوققا شىعاردى، ال اقش بۇل مالىمدەمەنى راستايتىن دالەلدەر كەلتىرمەدى.
پىكىر قالدىرۋ