كورنەكى جازۋشى، اتاقتى "قان مەن تەر" تريلوگياسىنىڭ اۆتورى ءابدىجامىل نۇرپەيىسوۆ 98 جاسقا قاراعان شاعىندا قايتىس بولدى.
جازۋشى.1924 جىلى 22 قازاندا قىزىلوردا وبلىسى، ارال اۋدانىنىڭ قۇلاندى اۋىلدىق كەڭەسىنە قاراستى ۇشكوڭ دەگەن جەردە تۋعان.
1942–1945 جج. ۇلى وتان سوعىسىنا قاتىسقان. 1956 جىلى ماسكەۋدەگى م.گوركيي اتىنداعى ادەبيەت ينستيتۋتىن بىتىرگەن، 1962–1964 جج. «جۇلدىز» جۋرنالىنىڭ باس رەداكتورى بولدى. 1992 جىلدان حالىقارالىق قازاق پەن كلۋبىنىڭ پرەزيدەنتى، 2000 جىلدان «تاڭ-شولپان» جۋرنالى رەداكتورلار كەڭەسىنىڭ ءتوراعاسى.
ادەبيەتكە 1947 جىلدان ارالاسا باستادى. تۇڭعىش شىعارماسى – ۇلى وتان سوعىسى تاقىرىبىنا ارنالعان «كۋرليانديا» رومانى 1950 جىلى جارىق كوردى. بۇل شىعارماسى ءۇشىن جازۋشىعا جامبىل اتىنداعى رەسپۋبليكالىق سىيلىق بەرىلدى. «كۋرليانديا» رومانىن كەيىننەن وڭدەپ، تولىقتىرىپ، 1958 جىلى «كۇتكەن كۇن» دەگەن اتپەن قايتا جاريالادى. «قان مەن تەر» تريلوگياسى (1-كىتاپ – «ىمىرت»، 1961؛ 2-كىتاپ – «سەرگەلدەڭ»، 1964؛ 3-كىتاپ – «كۇيرەۋ»، 1970) جانە «سەڭ» (1983)، «سوڭعى پارىز» (1999) روماندارى دۇنيە ءجۇزى حالىقتارىنىڭ كوپتەگەن تىلدەرىنە اۋدارىلعان.
«قان مەن تەر» رومانى بويىنشا جاسالعان ينسەنيروۆكاسى م.اۋەزوۆ اتىنداعى اكادەميالىق قازاق دراما تەاترىنىڭ (1974 جىلدان) رەپەرتۋارىنان تۇراقتى ورىن الدى، ەكرانعا شىعارىلدى. «سوڭعى پارىز» رومان-ديلوگياسى – الەۋمەتتىك-پسيحولوگيالىق شىعارما. ديلوگيادا ارال تەڭىزىنىڭ اپاتقا ۇشىراۋ حيكاياسى ناقتى سۋرەتتەلگەن. شىعارمادا ەكولوگيا، تابيعات پەن ادام اراقاتىناسىن تولعاعان قالامگەر وقىرمانداردى رۋحاني-ادامگەرشىلىك مۇراتتارعا جەتەلەيدى. تاڭدامالى ادەبي-سىن ماقالالارى «تولعاۋ» (كەيىننەن «جۇرەگى تولى جىر ەدى») دەگەن اتپەن قازاق جانە ورىس تىلدەرىندە جەكە كىتاپ بوپ شىقتى (1972)، 1985 جىلى «اقبيداي تۋرالى اڭىز» اتتى وچەركتەر جيناعى جارىق كوردى.
ا.پ.چەحوۆتىڭ، ا.م.گوركييدىڭ، نازىم حيكمەتتىڭ، يسپان جازۋشىسى ا.كەسوننىڭ شىعارمالارىن قازاق تىلىنە اۋدارعان.
كسرو مەملەكەتتىك سىيلىعىنىڭ لاۋرەاتى (1974). 2001 جىلى ماسكەۋدەگى حالىقارالىق ادەبي قوردىڭ «زا چەست ي دوستوينستۆو»، 2003 جىلى حالىقارالىق م.شولوحوۆ اتىنداعى سىيلىقتاردىڭ لاۋرەاتى اتاندى. قىزىل جۇلدىز، ەڭبەك قىزىل تۋ، «قۇرمەت بەلگىسى»، «حالىقتار دوستىعى» (1984)، «وتان» (1994) وردەندەرىمەن جانە مەدالدارمەن، رسفسر جوعارعى كەڭەسى پرەزيديۋمىنىڭ قۇرمەت گراموتاسىمەن ماراپاتتالعان. 1985 جىلى قازاق كسر حالىق جازۋشىسى قۇرمەتتى اتاعى بەرىلدى.
پىكىر قالدىرۋ