الماتى اكىمى ەربولات دوسايەۆتىڭ وكىمىمەن الماتى قالاسى اكىمىنىڭ ورىنباسارى بولىپ قىرىقبايەۆ ارمان ورازباي ۇلى تاعايىندالدى.

ارمان قىرىقبايەۆ 1976 جىلى 20 قازاندا سەلينوگراد قالاسىندا دۇنيەگە كەلگەن.

قازاق مەملەكەتتىك باسقارۋ اكادەمياسىنىڭ، سونداي-اق قازاقستان رەسپۋبليكاسى سىرتقى ىستەر مينيسترلىگىنىڭ ديپلوماتيالىق اكادەمياسىنىڭ تۇلەگى. ماماندىعى بويىنشا حالىقارالىق ەكونوميست.

مەملەكەتتىك قىزمەتتە، مادەنيەت جانە جاستار ساياساتى سالاسىندا 25 جىلدان استام جالپى ەڭبەك ءوتىلى بار.

ەڭبەك جولىن 1996 جىلى قازاقستان رەسپۋبليكاسى سىرتقى ىستەر مينيسترلىگىنىڭ رەفەرەنتى، اتتاشەسى بولىپ باستاعان.

1997-1999 جىلدارى – قازاقستان رەسپۋبليكاسىنىڭ وزبەكستانداعى ەلشىلىگىنىڭ اتتاشەسى، 1999-2000 جىلدارى – قازاقستان رەسپۋبليكاسى سىرتقى ىستەر مينيسترلىگىنىڭ ءۇشىنشى حاتشىسى، كەيىن قازاقستان رەسپۋبليكاسى سىرتقى ىستەر مينيسترلىگى تمد ىستەرى كوميتەتىنىڭ ەكىنشى حاتشىسى.

2002-2004 جىلدارى – «ABE كورپوراسياسى» جاق ستراتەگيا جانە ماركەتينگ دەپارتامەنتىنىڭ ديرەكتورى، 2004-2005 جىلدارى – «ك-مارت» ج ش س باس ديرەكتورى.

2005 جىلى مەدەۋ اۋدانى اكىمىنىڭ ورىنباسارى، 2005 جىلدان 2006 جىلعا دەيىن الماتى قالاسى جاستار ساياساتىن دامىتۋ مەملەكەتتىك قورىنىڭ ديرەكتورى، 2006 جىلدىڭ ساۋىرىنەن 2008 جىلدىڭ اقپانىنا دەيىن قازاقستان رەسپۋبليكاسى مادەنيەت جانە اقپارات مينيسترلىگى قوعامدىق-ساياسي جۇمىس جانە جۇرتشىلىقپەن بايلانىس دەپارتامەنتىنىڭ ديرەكتورى قىزمەتتەرىن اتقارعان.

2010 جىلدىڭ قاڭتارىنان 2012 جىلدىڭ اقپانىنا دەيىن قازاقستان رەسپۋبليكاسى مادەنيەت جانە اقپارات مينيسترلىگى مادەنيەت كوميتەتىنىڭ ءتوراعاسى، قاراعاندى وبلىسى اكىمىنىڭ ورىنباسارى قىزمەتتەرىن اتقاردى.

2012-2014 جىلدارى قازاقستان رەسپۋبليكاسىنىڭ مادەنيەت جانە اقپارات ۆيسە-مينيسترى لاۋازىمىندا بولدى. 2014-2015 جىلدارى Nur Otan پارتياسى ءتوراعاسى ءبىرىنشى ورىنباسارىنىڭ كەڭەسشىسى بولعان. سونداي-اق، 2015 جىلدىڭ قازانىنان 2019 جىلدىڭ شىلدەسىنە دەيىن الماتى قالاسى اكىمىنىڭ ىشكى ساياسات، دەنساۋلىق ساقتاۋ، ءبىلىم بەرۋ، مادەنيەت، جاستار ساياساتى، تىلدەردى دامىتۋ جانە باسقا دا ماسەلەلەر جونىندەگى ورىنباسارى قىزمەتىن اتقاردى.

سوڭعى اتقارعان قىزمەتى – Nur Otan پارتياسىنىڭ حاتشىسى.