سوڭعى جىلدارى قازاقستاندا ءۇي كەزەگىندە تۇرعاندار سانى ەداۋىر ارتىپ،  591 مىڭعا جەتكەن. مۇنداي دەرەكتى ءماجىلىس دەپۋتاتى ەلنۇر بەيسەنبايەۆ پرەمەر-مينيستر ءا.سمايىلوۆقا جولداعان ساۋالىندا ءمالىم ەتتى.

دەپۋتات قالىپتاسقان احۋالدى ەسكەرىپ، ۇكىمەتتەن ناقتى شەشىمدەر تىزبەگىن قاراستىرۋدى سۇرايدى.

– 2018 جىلدان بەرى كەزەكتە تۇرعان ادامداردىڭ ءتىزىمى شامامەن 130 مىڭعا كوبەيىپ، 591 مىڭ تىركەلۋشىنى قۇراپ وتىر. ونىڭ ىشىندە، ولاردىڭ سانى شىمكەنتتە 14 مىڭعا ءوسىپ 48 442 ادام بولسا، الماتى وبلىسىنداعى ءۇي كەزەگىن كۇتۋشىلەردىڭ سانى 17 مىڭعا ءوسىپ 59 067 جەتتى، ال تۇركىستاندىق كەزەكتەگى سان 19 مىڭعا ارتىپ، 47 409 وتباسىنى قۇراپ وتىر. بۇل سيفرلار تەك وسۋمەن الەك بولسا، پاتەر جالداعان وتباسىلار كوشۋمەن الەك. مەملەكەت باسشىسى 2020 جىلدىڭ باسىنا دەيىن "باقىتتى وتباسى" باعدارلاماسىنىڭ اۋقىمىن كەڭەيتۋدى تاپسىرعان بولاتىن. ال ۇكىمەت بولسا، تەك قارجىنى ۇلعايتۋمەن شەكتەلدى. وسى ورايدا، الەۋمەتتىك وسال توپتارعا كىرەتىن جەتىمدەر مەن مۇگەدەكتەر ساناتى قايتا سىرتتا قالىپ قويدى. سونىمەن قاتار، 2022 جىلدىڭ ەكىنشى ايى باستالعانىمەن "شاڭىراق" باعدارلاماسىنا ارنالعان قارجى ءالى ورتاق وپەراتورعا ۇيلەستىرىلمەگەن. ۇكىمەت ءۇشىن ءبىر اي ۋاقىت ەمەس شىعار، ال پاتەر جالداۋشى ءۇيسىز وتانداسىمىزعا بۇل كەزەكتى دالاعا كەتكەن پاتەراقىسىنىڭ سوماسى، – دەدى ول.

دەپۋتات كوتەرىلگەن ماسەلەلەر، ەلىدەگى تۇرعىن ۇيمەن قامتاماسىز ەتۋ ماسەلەلەرىنىڭ ءالسىز، ءارى ءتيىمسىز ىسكە اسىرىلىپ كەلە جاتقاندىعىن اڭعارتىپ وتىرعانىن اتاپ ءوتتى.

– وسىعان وراي، ۇكىمەت تاراپىنان دايارلانىپ جاتقان "تۇرعىن ءۇي ساياساتى" تۋرالى زاڭنامانىڭ جوباسىنا سوڭعى ورىن العان وقيعالاردى ەسكەرە كەلە، ناقتى شەشىمدەر تىزبەگىن قاراستىرۋدى سۇرايمىز. ونىڭ ىشىندە سۋبسيديالاۋ مەحانيزمدەرىنە بايلانىستى قوعام پىكىرىنە قۇلاق اسۋدى سۇرايمىز، – دەدى دەپۋتات.