ءماجىلىس "قازاقستان رەسپۋبليكاسىنىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ" تۋرالى زاڭ جوباسىن ءبىرىنشى وقىلىمدا ماقۇلدادى.
زاڭ جوباسى مەملەكەتتىك قىزمەتشىلەر مەن ولاردىڭ ايەلىنىڭ رەسمي تابىسى مەن شىعىنى ارالىعىنداعى الشاقتىقتى باقىلاۋدى كوزدەيدى.
"مەملەكەتتىك قىزمەتشىلەردىڭ، ولارعا تەڭەستىرىلگەن ادامدار، ولاردىڭ جۇبايلارىنىڭ شىعىستارى كىرىستەرىنە قانشالىقتى سايكەس كەلەتىنى باقىلانادى. ءارى فيسكالدىق جانە مانساپتىق سانكسيالار بەلگىلەنەدى. مۇنداي سانكسيالار كىرىس پەن شىعىستاعى ايتارلىقتاي الشاقتىقتار ءۇشىن قولدانىلادى. ماسەلەن، ەگەر شىعىستار مەن كىرىستەر الشاقتىعىنىڭ سوماسى ەڭ تومەن ەسەپتىك كورسەتكىشتىڭ مىڭ ەسەلەنگەن مولشەرىنەن اسىپ كەتسە (2022 جىلى 3 ملن 63 مىڭ تگ)، مەملەكەتتىك قىزمەتشىگە الشاقتىق سوماسىنىڭ 90 پايىزى مولشەرىندە اكىمشىلىك ايىپپۇل سالىنادى. ەگەر دە شىعىستار مەن كىرىستەر الشاقتىعىنىڭ سوماسى مەملەكەتتىك قىزمەتشىنىڭ جىلدىق كىرىسىنەن اسىپ كەتسە، وندا ول مەملەكەتتىك قىزمەتتەن بوساتىلادى.
زاڭ بويىنشا ءاربىر جاعدايدا ادامعا شىعىستارىنىڭ زاڭدىلىعىن نەگىزدەۋ مۇمكىندىگى بەرىلەدى.
وزگەرىستەردى 2027 جىلدان باستاپ قولدانىسقا ەنگىزۋ جوسپارلانىپ وتىر، ويتكەنى، 2025 جىلى ءوز كىرىستەرىنىڭ مولشەرى تۋرالى رەسپۋبليكانىڭ بارلىق ازاماتتارى ەسەپ بەرەتىن بولادى، ال 2026 جىلدان باستاپ ولاردىڭ شىعىستارىن كىرىستەرىمەن سالىستىرۋ پروسەسى باستالادى.
پىكىر قالدىرۋ