رەسەي قورعانىس مينيسترلىگى ۋكراينامەن شەكارادا ورنالاسقان كەيبىر اسكەرلەر وقۋ-جاتتىعۋلاردى اياقتاعاننان كەيىن بازالارىنا ورالىپ جاتقانىن حابارلاعانى "شيەلەنىس باسەڭدەيدى" دەگەن ءۇمىتتى ارتتىرعان. الايدا ۋكراينا ماڭىنداعى اسكەري جاتتىعۋلار جالعاسۋدا جانە قانشا بولىمشە شىعارىلىپ جاتقانى بەلگىسىز.
ناتو قورعانىس اليانسىنىڭ باسشىسى ءالى دەەسكالاسيانى كورمەگەنىن ايتتى، ءبىراق ماسكەۋدەن ايتىلعان سيگنالدار وپتيميستىك ءۇمىت سىيلايدى.
اقش پرەزيدەنتى دجو بايدەن ۋكراينا شەكاراسى ماڭىندا بۇرىنعىدان دا كوپ اسكەر بار ەكەنىن جاريالاعان.
رەسەي پرەزيدەنتى ۆلاديمير پۋتين باسپا ءسوز ءماسليحاتىندا رەسەي ەۋروپادا سوعىستى قالامايتىنىن مالىمدەگەن.
ەۋروپالىق وداق رەسەي قاۋىپسىزدىك ماسەلەلەرىن تالقىلاۋعا دايىن ەكەنىن ايتادى، ءبىراق سوعىس جاعدايىندا رەسەيدەن گەرمانياعا باراتىن نەگىزگى گاز قۇبىرى "ىسكە قوسىلمايدى" دەپ ەسكەرتەدى.
بۇعان دەيىن ۇلىبريتانيا پرەمەر-مينيسترى بوريس دجونسون رەسەيدەن "ارالاس سيگنالدار" كەلىپ جاتقانىن جانە ۋكرايناعا قاتىستى بارلاۋ "ءالى دە كوڭىل كونشىتپەيتىن اقپاراتتاردى كورسەتەتىنىن" جەتكىزگەن.
ول رەسەيدىڭ ۋكراينا شەكاراسى ماڭىندا جانە بەلارۋستە دالالىق اۋرۋحانالار سالىپ جاتقانىن اتاپ ءوتتى. دجونسون رەسەيدىڭ بۇل ارەكەتتەرىن "تەك (شابۋىلعا) دايىندىق رەتىندە تۇسىنۋگە بولادى" دەدى.
"ۋكراينامەن شەكاراداعى وتە جاقىن جەردە باتالوندىق تاكتيكالىق توپتار كوبىرەك. ماسكەۋ كەز كەلگەن ساتتە (ۋكرايناعا) سوعىس اشۋ مۇمكىن. مەنىڭ ويىمشا قازىرگى ۋاقىتتا ءبىر بىرىنە ۇقساماعان ءار ءتۇرلى سيگنالدار بار" دەپ تۇيىندەدى ول.
سوڭعى ايلاردا رەسەي ۋكراينامەن شەكاراعا 100 مىڭنان استام اسكەرى مەن اسكەري تەحنيكاسىن ورنالاستىرعان. باتىس ەلدەرى "ماسكەۋ كورشىسىنە باسىپ كىرۋى مۇمكىن" دەپ قاۋىپتەنەدى. ال رەسەي ىقتيمال شابۋىل تۋرالى جوسپارلاردى جوققا شىعارىپ كەلەدى.
پىكىر قالدىرۋ