ساياساتتانۋشى، بەلسەندى سانجار بوقايەۆ باسپا ءسوز جيىنىن وتكىزىپ، "نامىس" دەپ اتالاتىن ساياسي پارتيا قۇراتىنىن جاريالادى.

ساياساتتانۋشى "نامىس" ەل جاستارىنا يەك ارتىپ، ادامي قۇندىلىقتى، ادامي كاپيتالدى باستى ورىنعا شىعاراتىن سيفرلىق پارتيا بولاتىنىن ايتادى. ول اتاۋداعى "سيفرلىق" ءسوزىن پارتيا جۇمىسىن جاستار كوپتەپ وتىراتىن جەلىلىك پلاتفورمالار ارقىلى ىلگەرىلەتىپ، قاندايدا ءبىر ماسەلەنى اشىق ءارى ەلەكتروندىق فورماتتا تالقىلاۋ نيەتىمەن بايلانىستىردى.

سوزىنشە، پارتيا قۇرۋ تۋرالى شەشىمگە كەلۋىنە ەلدە بولىپ جاتقان جاعدايلاردى وزگەرتۋگە دەگەن قۇلشىنىس پەن كوپشىلىكتىڭ سۇراۋى سەبەپ بولعان.

سانجار بوقايەۆتى پارتيا قۇرۋعا شاقىرعان ادامداردىڭ جازبالارى. فوتو: Qamshy.kz

پارتيا باعدارلاماسى 7 باعىتتان تۇرادى:

1. ءادىل، تاۋەلسىز، ادال سوت جۇيەسىن قۇرۋ؛

2. جەمقورلىققا ىمىراسىز كۇرەس جاريالاۋ؛

3. مەملەكەتتى، قوعامدى، جاستاردى دامىتۋ ءۇشىن مادەني ريەۆوليۋسيا جاريالاۋ؛

4. تولىق ساياسي ترانسفورماسيا جۇرگىزۋ (ءادىل، تاۋەلسىز سايلاۋ جۇيەسىن قۇرۋ، جاڭا پارتيالاردى تىركەۋ، ءوزىن ءوزى ۇسىنۋ قۇقىعىن قايتارۋ، پارلامەنت سايلاۋىن وتكىزۋ، قالا اكىمدەرىن سايلاۋ)؛

5. مەملەكەتتىك اپپارات سانىن قىسقارتىپ، تيىمدىلىگىن ارتتىرۋ؛

6. ساپالى بىلىممەن، مەديسينامەن قامتاماسىز ەتۋ؛

7. جاستارعا ارنالعان زاۋىتتار (جۇمىس ورىندارىن) اشۋ؛

ساياساتتانۋشى پارتيا ءتوراعاسى سايلاۋ ارقىلى تاڭدالاتىنىن، تىركەلىپ، پارلامەنتكە ءوتىپ جاتسا، بيۋدجەت ەسەبىنەن قارجىلاندىرۋدان باس تارتاتىنىن ءمالىم ەتتى. سونداي-اق كاسىپكەرلەردەن دە قارجى الۋ ويىندا جوق ەكەنىن جەتكىزىپ، پارتيا ونىڭ مۇشەلەرىنىڭ جارناسى نەگىزىندە ءوزىن-وزى قارجىلاندىراتىنىن ايتتى.

سونىمەن قاتار ول ەلدەگى جەمقورلىقتى 3 جىلدا جويۋعا بولاتىنداي جوسپارى بارىن اتاپ ءوتتى.

ساياساتتانۋشى وزىنە قويىلعان ساۋالدارعا جاۋاپ بەرە وتىرىپ، بيلىكتىڭ بولماسا، قاندايدا ءبىر كلاننىڭ ساياسي جوباسى ەمەس ەكەنىن، مەملەكەتتىك قىزمەتتە مول تاجىريبە جيناپ، ول جەردەگى مەحانيزم ىشتەي قالاي جۇمىس ىستەيتىنىن، ونى وزگەرتۋ جولدارىن بىلەتىنىن ايتتى.