قىرعىزستان پروكۋراتۋراسى قاڭتار وقيعاسى كەزىندە ۇستالعان قىرعىزستاندىق مۋزىكانت ۆيكرام رۋزاحۋنوۆتى ازاپتاۋ فاكتىسى بويىنشا ءىس قوزعادى، دەپ حابارلادى كازتاگ سايتى.

– بىشكەكتىڭ لەنين اۋدانىنىڭ پروكۋرورى قازاقستاندا ۆيكرام رۋزاحۋنوۆتى ازاپتاۋ فاكتىسى بويىنشا قىلمىستىق ءىس قوزعادى، – دەپ مالىمدەدى مۋزىكانتتىڭ ادۆوكاتى نۇربەك توقتاكۋنوۆ.

ونىڭ ايتۋىنشا، قىرعىزستان كونستيتۋسياسىنىڭ 51-بابى 6-تارماعىنا سايكەس مەملەكەت ءوز ازاماتتارىن ەلدەن تىس جەرلەردە دە قورعايدى.

– ەگەر قازاقستان بيلىگى ۆيكرامدى ازاپتاعانداردى جازالاماسا، ءبىزدىڭ بيلىك ولاردى تاۋىپ، جازالاۋى كەرەك. ءبىراق قازاقستاننىڭ سىبايلاس جەمقورلىققا قارسى اگەنتتىگى بۇل ىسكە قاتىستى ءوز بەتىنشە تەكسەرۋ باستاپ كەتكەنىن ايتا كەتكەن ءجون. ەندى ءبارى قازاقستان مەن قىرعىزستان قۇقىق قورعاۋ ورگاندارىنىڭ كيشينيەۆ كەلىسىم (ءاربiر ۋاعدالاسۋشى تاراپتاردىڭ ازاماتتارى، سونداي-اق ونىڭ اۋماعىندا تۇراتىن باسقا ادامدار باسقا ۋاعدالاسۋشى تاراپتاردىڭ سوتتارىنا، پروكۋراتۋراسىنا، iشكi iستەر ورگاندارىنا، قاۋiپسiزدiك ورگاندارىنا جانە قۇزىرەتiنە ازاماتتىق، وتباسىلىق جانە قىلمىستىق iستەر جاتاتىن وزگە دە مەكەمەلەرiنە ەركiن جانە كەدەرگiسiز جۇگiنۋگە قۇقىلى – رەد) اياسىنداعى ءوزارا ءىس-قيمىلىنا بايلانىستى، – دەپ ايتتى توقتاكۋنوۆ.

ەسكە سالا كەتەيىك، 9 قاڭتاردا "قازاقستان" جانە "حابار 24" ارنالارى "قازاقستانداعى ميتينگكە قاتىسقانى ءۇشىن اقشا الدى" دەپ قىرعىزستاندىق ازاماتتى كورسەتكەن ەدى. ۆيدەودا بەتى-اۋزى كوگەرگەن ازامات 1 قاڭتاردا بەيتانىس ادامدار تەلەفون ارقىلى حابارلاسىپ، ميتينگىگە قاتىسۋ ءۇشىن 90 مىڭ تەڭگە ۇسىنعانىن، بيلەت اپەرگەنىن، پاتەرگە ورنالاستىرعانىن ايتادى. 

كوپ ۇزاماي قىرعىزستاندىق باسىلىمدار ۆيكرام رۋزاحۋنوۆ قىرعىزستاندا بەلگىلى دجاز مۋزىكانتى ەكەنىن، قازاقستانعا كونسەرتكە كەلگەنىن جارىسا جازدى. 

قىرعىزستاننىڭ سىرتقى ىستەر مينيسترلىگى وقيعاعا بايلانىستى تەكسەرىس جۇرگىزىپ، رۋزاحۋنوۆقا پوليسيا ءزابىر كورسەتكەنىن مالىمدەپ، قازاقستانعا قارسىلىق نوتاسىن جاريالادى.

10 اقپان كۇنى ۆيكرام رۋزاحۋنوۆ الەۋمەتتىك جەلىدەگى پاراقشاسىندا قازاقستاننىڭ تەرگەۋ يزولياتورىندا ازاپتالعانىن مويىنداپ، مالىمدەمە جاسادى.