پرەزيدەنتتىڭ باسپا ءسوز حاتشىسى بەرىك ءۋالي وفشورلىق شوتتاردا ق.توقايەۆتىڭ اۋلەتىنە تيەسىلى اكتيۆتەر مەن شۆەيساريا جانە ماسكەۋدە بىرنەشە جىلجىمايتىن مۇلىك بار دەلىنگەن اقپاراتتى "فەيك"، "اقپاراتتىق شابۋىل" دەپ باعالادى.
"كەيبىر بۇقارالىق اقپارات قۇرالدارى جازىپ جاتقانداي مەملەكەت باسشىسى قاسىم-جومارت توقايەۆتىڭ شۆەيساريالىق بانكتە قارجىلىق شوتى جوق. سونداي-اق پرەزيدەنتتىڭ شەتەلدىك بانكتەر مەن وفشورلىق كومپانيالارعا دا ەشقانداي قاتىسى بولماعان جانە شەتەلدە جىلجىمايتىن مۇلكى دە جوق. قاسىم-جومارت كەمەل ۇلىنىڭ بۇرىنعى جۇبايىنىڭ دا ماقالادا جازىلعانداي ەشقاشان قارجىلىق شوتى بولماعان. تيمۋر توقايەۆقا كەلەتىن بولساق، جاسى 38-دە. ول – كاسىپكەر، ەشقاشان مەملەكەتتىك قىزمەتتە ىستەمەگەن. وزدەرىڭىز بىلەسىزدەر پرەزيدەنت ەكونوميكا مەن ساياساتتاعى مونوپوليانى شەكتەۋگە، رەفورمالاردى جۇزەگە اسىرۋعا كۇش سالىپ كەلەدى. بۇل مەملەكەت باسشىسىنىڭ وسىنداي شەشىمدەرىن جاقتامايتىن ادامداردىڭ ادەيى تاراتىپ جاتقان فەيك اقپاراتتىق شابۋىلى دەپ ويلايمىن" دەلىنگەن حابارلامادا.
بۇعان دەيىن "Credit Suisse قۇپيالارى" ترانسشەكارالىق جۋرناليستىك زەرتتەۋ جوباسى اياسىندا 2012 جىلى شۆەيساريالىق Credit Suisse بانكىندەگى ەسەپشوت جابىلعاننان كەيىن توقايەۆتىڭ وتباسى شۆەيساريادا جەكە شوتتارى بار بريتان ۆيرگين ارالدارىندا وفشورلىق كومپانيالار اشقانى، 2014 جىلى ءبىر ساتتە 5 ميلليون دوللار اكتيۆى بولعان ۇلىبريتانياداعى كومپانيانى باسقارىپ وتىرعانى ايتىلعان. بۇعان قوسا توقايەۆتار وتباسى ماسكەۋ مەن جەنيەۆادا قۇنى كەم دەگەندە 7،7 ميلليون دوللار بولاتىن مۇلىكتى يەلەنگەنى ايتىلعان.
"سول جىلدارى توقايەۆ جوعارى مەملەكەتتىك لاۋازىمدى قىزمەت اتقاردى، اتاپ ايتقاندا، سىرتقى ىستەر ءمينيسترى، پرەمەر-مينيستر جانە سەنات سپيكەرى بولدى. توقايەۆتىڭ دا، ايەلىنىڭ دە كاسىبى نەمەسە باسقا بايلىق كوزى بولعان جوق. تەك ولاردىڭ ۇلى تيمۋردىڭ ناقتى بيزنەسكە قاتىسى بولعان، ونىڭ ءوزى دە مۇقيات زەرتتەۋدى قاجەت ەتەدى. قازاقستاندىق ب ا ق تاراتقان اقپارات بويىنشا، ول مۇناي كەن ورنىن يگەرۋ قۇقىعىنا يە بولعان مۇناي كومپانياسىنىڭ ورتاق يەسى رەتىندە تىركەلگەن. كەيىن بۇل كومپانيا ميلليونداعان تابىس تاپتى. ول كەزدە تيمۋر ەندى 18 جاسقا تولعان" دەلىنگەن جۋرناليستىك زەرتتەۋدە.
