اقش رەسەي ۋكرايناعا شابۋىل جاساعاننان كەيىن ولتىرىلەتىن نەمەسە لاگەرلەرگە جىبەرىلەتىن ۋكرايندەردىڭ ءتىزىمىن جاساعانىن ەسكەرتەدى.
بىرىككەن ۇلتتار ۇيىمىنا جىبەرىلگەن جانە امەريكالىق باق-تا جاريالانعان حاتتا ءتىزىم تۋرالى "سەنىمدى اقپارات" بار ەكەنى ايتىلعان.
ال كرەملدىڭ باسپا ءسوز حاتشىسى دميتريي پەسكوۆ اقش بارلاۋ قىزمەتى جاريالاعان "ءتىزىم" تۋرالى اقپارات "وتىرىك" دەپ مالىمدەدى.
ايتا كەتەيىك، ماسكەۋدەگى اقش ەلشىلىگى رەسەيدەگى قوعامدىق ورىنداردا امەريكالىقتارعا شابۋىل جاسالۋى مۇمكىن ەكەنىن ەسكەرتىپ، "ولاردى ەۆاكۋاسيالاۋ جوسپارلارى بولۋى كەرەك" دەپ مالىمدەدى.
پەسكوۆ ەسكەرتۋدى "وتە ورىنسىز" دەپ سيپاتتادى.
ول جۋرناليستەرگە ۋكراينانىڭ شىعىسىنداعى جاعداي "شيەلەنىستى" كۇيدە تۇرعانىن ايتتى.
سونىمەن قاتار، كرەمل اقش پەن رەسەي پرەزيدەنتتەرى اراسىنداعى ءسامميتتىڭ ناقتى جوسپارلارى بار ەكەنىن جوققا شىعارعانىمەن، كەلىسسوزدەرگە اشىق ەكەنىن مالىمدەگەن.
"سىرتقى ىستەر مينيسترلەرى دەڭگەيىندە ديالوگتار جالعاسۋى ىقتيمال. قاجەت بولعان جاعدايدا، ارينە، رەسەي مەن امەريكا پرەزيدەنتتەرى تەلەفون ارقىلى نەمەسە باسقا ادىستەرمەن حابارلاسادى" دەدى پەسكوۆ.
