وزبەكستاننىڭ نۇر-سۇلتان قالاسىنداعى ەلشىلىگى قازاقستاننىڭ سىرتقى ىستەر مينيسترلىگىنە قاڭتار وقيعاسىنان كەيىن ۇستالعان ازاماتتارى تۋرالى تولىق اقپارات بەرۋدى سۇراپ، نوتا جولدادى. بۇل تۋرالى وزبەكستان ءسىم رەسمي وكىلى يۋسۋپ كابۋلجانوۆ ءمالىم ەتتى.
"سوڭعى كۇندەرى بۇقارالىق اقپارات قۇرالدارى قازاقستان رەسپۋبليكاسى ادام قۇقىعى جونىندەگى ومبۋدسمەن ەلۆيرا ءازىموۆاعا سىلتەمە جاساي وتىرىپ، قازاقستاندا قاڭتارداعى جاپپاي تارتىپسىزدىكتەردەن كەيىن 18 شەتەل ازاماتى ۇستالعانى، ونىڭ ىشىندە 14 وزبەكستان ازاماتى بارى تۋرالى حابارلادى" دەلىنگەن حابارلامادا.
وزبەكستان ەلشىلىگى قازاقستان سىرتقى ىستەر مينيسترلىگىنەن ۇستالعان ازاماتتارى تۋرالى، ولار قايدا ۇستالىنىپ وتىرعانى، جاۋاپكەرشىلىككە تارتۋ سەبەبى جايلى تولىق اقپارات بەرۋدى، قامالعاندار مەن كونسۋلدىڭ كەزدەسۋىن ۇيىمداستىرۋدى سۇرايدى.
پىكىر قالدىرۋ